Danskit naalakkersuisui: Meeqqanut misiligutaasunut 2020-mi utoqqatsertoqassaaq.
- Pereersimasunik nassuiaateqarnerup ingerlateqqinneqarnissaanik Kalaallit Nunaanni Naalakkersuisut peqatigalugit aalajangiinerput nuannaarutigaara. Pisoq taanna Kalaallit Nunaata Danmarkillu ataatsimut oqaluttuarisaanerannut ilumoortumik paasisariaqakkatsinnut ilaavoq. Meeqqat taakku ilaqutaallu eqqarsaatigisariaqarpavut.
KNR-imut mailerluni danskit isumaginninnermut nunamullu namminermut ministeriat Astrid Krag oqarpoq.
Ilutigalugulu Social- og Indenrigsministeriet (Isumaginninnermut aamma Nunamut Namminermut Ministereqarfiup) aalajangiusimavaa “naalakkersuisut meeqqanut kalaallinut 22-nut taakkununnga utoqqatserniartut”.
Taamaalilluni ministeriunerup Mette Frederiksenip oqalugiarnermini juunimi oqaatigisai ministereqarfiup aalajangiusimavai.
Tassani kalaallinut meeqqanut misiligutaallutik Danmarkimut 1951-imi aallartinneqartunut pisortatigoortumik utoqqatsertoqarnissaa neriorsuutigaa. Aamma Danmarkimi meeqqat angerlarsimaffianni Godhavnimi nukappiaqqat 1900-kkut qeqqanni annertuumik atugarliortinneqarsimasut utoqqatserfigineqarnissaminnik neriorsorneqarput.
Utoqqatserneq taanna 13. aggusti nalunaarutigineqassaaq. Kalaallilli meeqqat misiligutaasimasut amiakkuinut utoqqatsernissaq suli ukiumik ataatsimik utaqqisinneqassaaq.
AAMMA ATUARUK Meeqqat misileraatigineqartut utoqqatserfigineqarnissartik utaqqeqqaartariaqassavaat
Tassami Naalakkersuisut aamma Løkkep naalakkersuisuisa ukioq manna marsimi pereersimasunik nassuiaaneq piniarsimasaat danskit naalakkersuisuisa S-it utaqqeqqaarniarpaat.
KNR-imut mailimini Astrid Krag ilassuteqarpoq Naalakkersuisut paaseqatigalugit pereersimasullu pillugit nassuiaaneq isumaqatigiissutigineqareersimasoq ataqqillugu danskit naalakkersuisuisa nassuiaanerup naammassinissaa utaqqeqqaarniaraat.
Qulartoqaraluartoq utoqqatsernissamik neriorsuineq
Kisianni Kalaallit Nunaanniit Folketingimut ilaasortaasa, Aki-Matilda Høegh-Damip (S) aamma Aaja Chemnitz Larsenip (IA) nassuiaaneq naammassereerpat ilumut danskit naalakkersuisui utoqqatserniarnersut sapaatit akunnerani kingullermi apeqquserpaat.
AAMMA ATUARUK Aki-Matilda Høegh-Damip ministerini isumaqatiginngikkai
- Nassuiaanerup taassuma qanoq kinguneqarnissa ernummatigaara, tassami utoqqatsertoqarnissa tunngaviginngimmagu. Imaannerluni nassuiaaneq utoqqatsertariaqannginnermik peqqutissarsiornerusoq?, Aki-Matilda Høegh-Dam 12. juuli KNR-imut oqarpoq.
Parteeqataata Isumaginninnermut Naalakkersuisup Martha Abelsenip (S) aalajangiusimavaa utoqqatsertoqartinnagu nassuiaaneq naammaassineqartariaqartoq.
AAMMA ATUARUK Meeqqanut misiligutaasunut utoqqatsernissap kinguartinnera kukkuneruvoq
Piorsarsimassutsikkut 1951-imi misiliineerup ingerlasimaneranik nassuiaatip tunngavia uani atuarneqarsinnaavoq.
Suliamut ilinniarsimasut nassuiaanermik suliaqartussat qanittukkut toqqarneqassapput, Social- og Indenrigsministeriet (Isumaginninnermut aamma Nunamut namminermut Ministereqarfik) paasissutissiivoq.
Suliaq kingusinnerpaamik 1. juuni 2020 nammassineqassaaq taavalu Naalakkersuisunut danskillu naalakkersuisuinut tunniuneqassalluni.
