Meeqqanut atuagaq nutaaq: Ataata isertitsivimmiippoq
![](/sites/default/files/styles/image_934x467/public/article_images/anstalt_lidtsne_630_0.jpg?itok=PYD3tPn2)
Sofusip ataatani maqaasivaa, qulingiluanik ukiullip ataataa pineqaatissinneqarsimasut inissiisarfianiimmat.
Amalia Lynge Pedersenip atuakkiaani nukappiaraq inuttaritinneqartup ajornartorsiutit kisimiilluni piginngilaa.
Nunatsinnilu meerarpassuit ilaqutariippassuillu anaana ataataluunniit isertitsivimmiilernera misigisarpaat.
Pisartoq paqugineqartoq tarnip nakorsaata atuakkiortullu killormut saatissallugu siunertaraat.
- Atuakkap 'Ataata isertitsivimmiippoq' siunertarivaa paqumigisinnaasartakkagut ammasumik oqallissitsiginerulernissai. Aamma siunertarivaa meeqqat angajoqqaami arlaat ilaqutamiluunniit arlaat isertitsivimmut pineqaatissinneqarluni isersimasariaqarnerani puigorneqartoortarneri takutinniarlugu, aamma meeqqat pisariaqartitsisarmata tassani, Amalia Lynge Pedersen oqarpoq.
Atuakkianilu nutaaq aqqutigalugu inersimasut, angajoqqaat, paaqqinnittarfinni sulisut, ilinniartitsisut allallu eqqugaasut ajornartorsiut oqaluuserilissagaat neriuutigaa.
- Tamanut allagaavoq. Atuffassinermi inuunermi eqqarsaatit misigissutsillu assigiinngitsut naapittakkagut ammasumik eqqartorneratigut meerarlu oqaloqatigineratigut oqilisarsinnaavagut, Amalia Lynge Pedersen oqarpoq.
Atuagaq 'Ataata isertitsivimmiippoq' Ilaqutariinnermut inatsiseqarnermullu Naalakkersuisoqarfimmut saqqummersitaavoq, saqqummerneralu Nuummi pineqaatissinneqarsimasunut inissiisarfimmi ataasinngorpat malunnartinneqassalluni.