Meeqqanut ambassadørit pisinnaatitaaffiit politikkikkut suliaqarnermi isumannaassavaat
Partiit tamarmik, suliatik aqqutigalugit meeqqat pisinnaatitaaffiisa ataqqineqarnissaat pillugu suliaqarusussuseqarnissaat Meeqqat Illersuisuata naatsorsuutiginerarpaa.
- Partiit tamarmik Meeqqanut Ambassadøreqalernissaannik siunnersuutip tapersersorneqarnissaa naatsorsuutigaara. Inuiaqatigiinnut, minnerunngitsumillu meeqqanut inuusuttunullu, ersarissumik takutitsissaaq meeqqat inuusuttullu isumalluutaasut pingaarnerpaat, Meeqqat Illersuisuat tusagassiorfinnut nalunaaruteqarluni taama allappoq.
Meeqqat nunatsinni pingaarnersatut Meeqqat Illersuisuata isigai, taakku Inatsisartut Naalakkersuisullu aalajangiussaannik ingerlatitseqqittussaammata.
AAMMA ATUARUK Meeqqat illersuisuat: - Meeqqat illersornissaannut iliuutsivut annikippallaarput
Meeqqat Illersuisuat aamma isumaqarpoq Inatsisartuni inatsisinik aalajangersaasoqartillugu suliniutinillu aallartisaasoqartillugu, tamakku nunatsinni meeqqanut inuusuttunullu sunniuteqakajuttartut aammalu naalakkersuinikkut aalajangiisoqartillugu meeqqat tusarniarneqartarnerat annikippallaartoq.
- Taamaammat Naalagaaffiit Peqatigiit meeqqat pillugit isumaqatigiissusiaanni, meeqqat pisinnaatitaaffiinut tunngatillugu aalajangersarneqartut partiinit eqqumaffigineqarnissaat isumannaarneqarnissaallu pingaaruteqarpoq, Meeqqat Illersuisuat allappoq.
AAMMA ATUARUK Meeqqat Illersuisuat: Meeqqat pisinnaatitaaffii unioqqutitsinneqarput
Partiit oktobarip qaammataa nallertinnagu meeqqanut ambassadørissamik toqqaaqquneqarput, toqqagaasullu meeqqat Illersuisuannit meeqqat pisinnaatitaaffii pillugit ilisimatinneqarnissaat kingornalu Meeqqanut Ambassadøritut suliassartik pillugu isumaqatigiissummik atsioqatigiissuteqartinnissaat pilersaarutigineqarpoq.
