Nutaarsiassaqartitsiviup tapiissutit annaavai
Aleqa Hammondip nalaani Naalakkersuisut aalajangerput Nutaarsiassaqartitsivimmut Sermitsiaq/AG-mut tapiissutaasartut 2,5 millioner koruunit unitsinniarlugit.
Nutaarsiassaqartitsiviup aviisinut tapiissutaasartunut 2,5 millioner koruuninut qinnuteqaat ullunik 14-nik kingusinaarluni tunniussimammagu, taamani peqqutaatinneqarpoq.
Aammattaaq Nutaarsiassaqartitsivik isumannaatsumik naatsorsuutimini tapiissutisinngikkaluarluni sinneqartoortarmat, Naalakkersuisut itigartitsinerminni tunngavilersuipput.
Aamma atuaruk Sermitsiaq AG-p tapiiffigineqannginnissaa Aleqap aalajangiusimavaa
Ilumut Naalakkersuisut aviisinut tapiissutaasartunut qinnuteqaat eqqortumik suliarisimaneraat, aningaasanut ataatsimiititaliap tamanna apeqqusersimavaa.
Pisortaqarfiup tapiissuteqarnissamut qinnuteqaat suliarisimaguniuk, kingusinaarsimagaluarpalluunniit taava kingusinaarluni tunniussisimaneq itigartitsinermut nassuiaatigineqarsinnaanngittoq, Naalakkersuisut akissutiminni nassuerput. Allatut oqaatigalugu qinnuteqaat taamaalillutik akuerisimavaat.
Aamma atuaruk DJ: Tusagassiuutit kiffaanngissuseqarnerannut sunniuteqarsinnaavoq
Aningaasaqarnermut ataatsimiititaliattaaq aviisinut tapiissutit tunniutinnginnerinut Nutaarsiassaqartitsiviup sinneqartoortarnera peqqutaatinneqartoq isornartorsiorsimavaa. Tassanittaaq Naalakkersuisut nassuerput aviisinut nuna tamaat saqqummersartunut tapiisoqarsinnaasoq, aamma ingerlanneqarnera ulorianartorsiunngikkaluarpalluunniit.
Taamaakkaluartoq Kukkunersiuinermut ataatsimiititaliap isumaqatigiittup Nunatta karsiata naatsorsuutai akuerineqartussanngorlugit innersuuppai.
Naallu Sermitsiaq/AG-ip, inatsisilerituut allallu tamakkulerisartut nalilersimagaluaraat suliap ingerlanneqarnerani inatsisitigut kukkusoqartarsimasoq, maanna Nutaarsiassaqartitsivik tassaalerpoq suliami ajorsartoq, 2,5 millionit tapiissutisiassaraluani annaagamigit.
