Martin Møller VM-mi unammeqataaqqaarmermini normu 3-nngorpoq

Sisoraaserluni VM Tysklandimi illoqarfimmi sisorartarfimmi Oberstdorf-mi pingasunngornermi aallartippoq.

10 kilometerimut saarlisaarluni unamminermi nunat siuarsimannginnerusut Danmarkip akuuffigisai anngunniullutik unammimmata Martin Møller Nuummi NSP-mi sungiusartartoq peqataavoq.

Tassani Martin Møller pingajuattut inissippoq tassani Thailandimioq ajugaavoq New Zealandimeersoq tulliusoq.

VM sioqqullugu Martin Møller imminut anguniagassippoq anngunniunnermi pikkorinnerit qulit akornannut inisseriassalluni.

- Ilimagisamit ingerlalluarneruvunga. Eqqarsarpunga ajugaariaannassallunga taamaattoq pingajuattut inissillunga. Ilimagisamit ingerlalluarneruvunga ukiut pingasut kingulliit Kalaallit nunaata avataani unamminikuunnginnama, Martin Møller KNR-mut oqarpoq.

AAMMA ATUARUK Martin Møller pingajussaa OL-mut annguterialerpoq

Maanna peqataaffisiginnaalerpai naatsumut unammineq, naatsumut iligiikkaarneq kiisalu sapaatip akunnera ataaseq qaangiuppat 15 kilometerimut saarlisaarnissaq.

15 kilometerimut unammineq Martin Møllerimut pingaaruteqarpoq tassani OL-mut anngunnissamut piumasaqaat angoriartussaagamiuk.

- 2013-mi aamma VM-qataavunga tassanilu anngunniunnermi aamma normu 3-tut inissillunga unamminernilu tulliuttuni ingerlalluarlunga, Martin Møller oqaluttuarpoq.

- Ilimagaara piginnaasakka 2013-misut pitsaatigisut, Martin Møllerip oqaatsini ilavai.

Siornatigut marloriarluni ukiuunerani OL-qataavoq.