Martin Møller pingajussaa OL-mut annguterialerpoq

Sisoraatinik oqilaniuttartoq Martin Møller Nuummeersoq qallunaat nunanut allanut unammisartuini utoqqaanersaalluni VM-qataalerpoq.
Martin Møller 2014
Martin Møller OL-mi 2014-mi aamma 2018-mi peqataavo. Maanna pingajussaa OL-mut annguterialerpoq Assi © : Martin Møller
Allattoq Noah Mølgaard
februaarip 05-at 2021 12:39

Martin Møller NSP Nuummeersoq suli Nunatsinni sisoraaserluni oqilaniutillaqqinnersaavoq

Maanna aamma nunani tamalaani illinertigut tamaviaarnissamut piareerpoq pingaanertut ukiuunerani 2022-mi OL annguffigeriassallugu. Qallunaat nunanut allanut unammisartui taamatut nalunaarput.

Martin Møller 2014-mi Ruslandimi OL-qataavoq aammalu 2018-mi Korea kujallermi OL-qataalluni. 2018-mi februarimi Korea kujallermi Pyeongchang-mi OL-qataareerluni nalunaaraluarpoq pikkorinnerni unammisartuunini unitsillugu.

Isumali pigineqarsinnaavoq nutaamik isummernissap tungaanut – aamma Martin Møllerimut.

- Piumassuseq uteqqipallanikuuvoq. Sungiusarluartuaannarpunga aamma Kalaallit Nunaanni qallunaallu pissartanngorniunneranni peqataasarlunga. Qasujaalluartutut misigisimavuna aammalu ullut tamaasa sisorartarnera nuannaralugu, Martin Møller KNR-mut oqarpoq.

AAMMA ATUARUK Martin Møller gjorde rent bord ved GM

2019-mi aamma 2020-mi qallunaani pissartaavoq unamminerlu kingulleq siorna februarimi pivoq coronamik nappaalanersuup unammersuarnernik matoqqatitsilernissaa sioqqutilaarlugu.

Periarfissagissaarpoq

Martin Møllerimut pisussaq tulleq tassaavoq Tysklandimi Oberstdorfimi VM-qarnissaa unamminerillu februarip 23-at aallartissapput.

AAMMA ATUARUK Martin Møllerip OL-imi unammeqataalernini nuannaarutigigaa

Qallunaat sisoraaserluni oqilaniunnermi nunanut allanut unammisartui nalunaarput Martin Møllerip pingaarnertut anguniagaa tassaasoq aappaagu OL-qarnissaanut anngunnissaq. Inuttaa aamma isumalluarpoq:

- Anngunnissamut periarfissaq siuliinisulli pitsaatigaaq. Anngunnissamut piumasaqaatit allanngungaarnikuunngillat allaat immaqa ajornannginnerulerlutik tassami OL-mut anngunniarnermi unamminerit tunaartarineqarsinnaasut arlalinngornikuupput, Martin Møller oqarpoq.

Sisorartartut pingasut Nunatsinneersut maanna OL-mut anngunnissaq anguniagarivaat. Taakku tassaapput sangusaartartoq Nuunu Chemnitz Berthelsen aamma sisoraaserluni ooqattaasartartoq Ukaleq Slettemark.