Timersorneq: Martin Møller ullumi unamminermi ajugaavoq

Martin Møller ullumi nunatsinni pissartanngorniuttoqarnerani 50 kilomiiterisut isorartutigisumik ujakkaarluni ullumi unamminermi ajugaavoq
Assi © : Bent Hjarbo/Danmarks Skiforbund
Allattoq Jonas Fievé, Paninnguaq Steenholdt
apriilip 01-at 2018 21:13

Ajugaassussaq pissanngatigineqarsimanngilaq, Martin Møllerimi 2 tiimit 16 minutsillu qaangiummata apuussimammat. 

Naak Martin Møller Arctic Circle Racemi sapaatip akunnerani kingullermi peqataagaluarluni ujakkaarnermi pissartanngorniunnermi ingerlalluarsimasoq, Finn Nielsenip KNR-imi timersornermut sammisaqartuata oqaatigaa.

- Ullumi 50 kilometeri aamma ajugaavaa taamaammat oqarsinnaavugut taakku guldtit pissarsiarisinnaasani tamakkerpai uani pissartanngorniunnermi, Finn Nielsen oqarpoq. 

Martin Møller Øystein Slettemarkimit 17 minutsinik sukkanerulluni apuuppoq. Øystein Slettemark unamminermi ajugaasuni tulliuvoq. 

Finn Nielsenilu naapertorlugu unamminermi ajugaasussap tullia pingajuallu pissanngatigineqarnerusimapput. Tassami Frederik Lundblad 20 sekundinik ajugaasup tullianit kigaannerulaaginnarsimammat. 

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq