Martin Møller ujakkaarluni GM-ertoqarnerani unammeqqaarnermi ajugaavoq
Arnat 10 kilometerinut angutillu 15 kilometerinut qangatut ujakkaarlutik ippassaq sukkaniuupput.
50-inik ukiulik Uiloq Slettemark NSP-meersoq takutitsillualaavissorpoq, taassumami minutsit 37-t sekundillu 15-it atorlugit 10 kilometerinut sukkaniuunnermi Nunatsinni arnani ujakkaallaqqinnerpaaq, Niviaq C. Berthelsen NUP-meersoq, minutsinik marlunnik sekundinillu 43-nik sukkanerulluni ajugaaffigaa.
Martin Møller NSP-meersoq angutit unammimmata kisiartaalluni sisoraatini pujassaaseqqaarnagit ingerlaarfik naavaa, kilometerinullu 15-inut ingerlaarnermi qattunerit sivingasuut aqqutigalugit ajaappiarsornerulluni, tamannalu iluatsitsissutigaa.
Martin Møllerimi minutsit 46.00-it atorpai, tulliulluni apuuttumit Frederik Petersenimit ISP-meersumit minutsinik sisamanik sukkanerulluni.
Nunatsinni ujakkaarluni pissartanngorniuttoqarnerani unamminerit tullinnguuttut tassaapput oqilaniulluni unamminerit.
