Martin Lidegaard De Radikale Venstremi siulittaasunngortoq
![](/sites/default/files/styles/image_934x467/public/article_images/20221102-203803-l-6992x4661ma.jpg?itok=ji8iB70Z)
Lidegaard nammineq, partiillu Folketingimi ilaasortaatitai, tusagassiortunut Christiansborgimi ippassaq unnukkut sassarnermi taama nalunaaruteqarput.
Sofie Carsten Nielsen partiip siulittaasuatut tunuarnissaq nammineq nalunaarutigereeraalu Lidegaard siulittaasunngorpoq. Folketingimut marlunngormat qinersereernerup kingorna tunuarpoq, De Radikalemmi Folketingimi ilaasortaatitai 16-ioriarlutik qulingiluanik ikilillutik arfineq-marluinnanngorput.
Sofie Carsten Nielsen Folketingimut kingullermik 2019-imi qinersinermut naleqqiullugu taassuma saniatigut ukioq manna qinersisikinneruvoq. Qinersisartut tatiginnikkunnaarnerannik tamanna ersersitsisoq oqaatigaa.
AAMMA ATUARUK Sofie Carsten Nielsen De Radikalit siuttuattut tunuartoq
Martin Lidegaardip siulittaasuulernera oqitsuinnaanaviarunanngilaq.
Danmarkimi naalakkersuisoqatigiiliorniarnermut isumaqatiiginniarnerit ministeriunerup atorfilittut najugarisaani Marienborgimi ullumi aallartipput, Folketingimi partiit ataatsimiinnissanut siullernut aggersarneqarsimallutik.
Ministeriunerup Mette Frederiksenip Folketingimut qinersisoqarnissaanut nalunaaruteqarnissaa De Radikale Venstrep piumasarisuuaat.
De Radikale Venstrekkulli Mette Frederiksenip ministerunerugallarnissaa taamaattoq aalajangeeqataaffigisinnaavaat.