Martha Lund Olsenip Sermersuumik naveersinini nassuiarusunngilaa
Nuuk TV-mi oqaluttuarineqareersutut angutip tappiitsup utoqqalinersiaqalernerata kingorna tapersersorteqarnissamut 48 tiiminit 6 tiimiinnanngorlugit annikillisaavigineqarsimanera, Martha Lund Olsenip ima oqaaseqarfigaa:
- Inuk ulluni kingullerni sammisarsi pisinnaasai nammineerluni taama killeqartigisut pitsaanerusumik naleqarnerusumik inuuneqassaguni aamma pisariaqartitai annertunerusut nalilersoqqittariaqaraat isumaqarpunga, Isumaginninnermut Naalakkersuisoq Martha Lund Olsen Nuuk TV-mut taama oqarpoq.
Taama oqaaseqarneranut Kommuneqarfik Sermersuumi Borgmesteri naammaginninngeqisoq ima akivoq:
-Sulianut ataasiakkaanut tunngasunut Naalakkersuisup oqaaseqartarnera takornartaallunilu ileqqorineqanngilaq, ingammik suliamut tunngasumut paasissutissat eqqortut ilisimanagit.
Neqeroorutit piumasimanngikkai
Kommunimiimmi KNR-imut paasissutissiineq tunngavigalugu Nuuk TV-mi tunngavittut saqqummiunneqartoq ilumuunngitsoq, angutilli pisinnaasaasa nalileqqinneqarneranut annikilliliineq tunngaveqartoq paasissutissani, KNR-ip pissarsiaani, saqqummerpoq.
Tassani aamma erserpoq angutip nerisaqarnermut ullukkullu ornittakkanut neqeroorutit piumasimanngikkai aamma tapersersorteqarnissamut neqeroorutip 26-tiimiusup novembarip qaammataani 8 tiimiinnaat atorsimagaa, decembarimilu 5 tiiminnaat erserluni.
Taarsiullugu angutip ikorfartorneqarnissamik kommunimit neqeroorutit, siunertanut allanut atorusunneruai, kommunip tapersersinnaanngisaanik.
Suliamut tunngasunut oqaaseqarumajunnaarpoq
Isumaginninnermut Naalakkersuisup Martha Lund Olsenip kommuni nalileeqqeqqugamiuk paasissutissat taakku ilisimanngilai. Suliamulli tunngasunut ullumikkut oqaaseqarusunngilaq.
- Borgmesterip taamatut isummernera akissuteqarfigerusunngilara, Isumaginninnermut Naalakkersuisoq KNR-mut ullumi taama oqarpoq.
