Martha Lund Olsen-ip aningaasat ullumikkut atorniarpai
'Én koruuni ullumi atugaq aqagu quleriaammik iluanaarutaassaaq' Oqaatsit taakku ilaatigut atorlugit, Ilaqutariinnermut Inatsisinullu Atuutsitsinermut Naalakkersuisup, Martha Lund Olsen-ip, ilaqutariinnermut aammalumi inunnik isumaginninnermut Naalakkersuisut suliniutaat ullumi saqqummiuppai.
Suliniutillu allat aallarteriaannaat, Ilaqutariinnermut Inatsisinullu Atuutsitsinermut Naalakkersuisup saqqummiussaannut ilaapput, soorlu ulloq unnuarlu paaqqinnittarfissaq Sisimiuniittup, inuussuttuaqaanullu annertuumik pinerluuteqarsimasunut arfineq pingasunut inissallip, atulersinneqarnissaanik siunertaq.
Ulloq unnuarlu inissiisarfissap illutassaa Sisimiuniittoq piareeqqavoq, taamaallaalli atulernissaannut amigaatit arlaqanngillat, soorlu isumannaallisaganngorlugu suliarineqarnissaa inissiisarfiillu qulersaannit avissartinneqarsinnaaneranut aningaasaqarnermut ataatsimiisitaliamit akuerineqarnissaa utaqqisaaginnalerluni.
Inatsilli nakuusernermut tunngasutseqartoq, Inatsiasrtuni ukiamut eqqartorneqareerpat tunngavissaqalernissaaq Martha Lund Olsenip naatsorsuutigaa.
Suliniutip tamassuma saniatigut aamma pilersaarutaavoq meeqqat inuusuttuaqqallu ulloq unnuarlu inissiisarfinniisinneqartartut tarnikkut ikiorserneqartarnissaat, tamanna tarnip pissusaannik ilisimasaqartunit suliarineqartassalluni. Taamalliornikkut inissinneqarnissamik utaqqisorpassuit ikiliosinneqarnissaat neriuutigineqarluni.
Tarnillu pissusaannik ilisimasallit suliassaaleqissanngeqaat, tassa maanna inersimasut meeraanerminni kinguaassiutitigut atornerlunneqarsimasut aamma sullinneqarnissaat siunertaavoq. Taamaaliornikkut taakku meeraasa atornerlunneqartannginnissaat anguniarneqarluni. Suliniullu tamanna piffissaq ungasinngitsoq qaangiuppat piviusunngussasoq, Martha Lund Olsenip oqaatigaa.
Ikiorsiinernut assigiinngitsunut aningaasat atugassat suminngaanniit aaneqassanersut suli erseqqissumik oqaatigineqarsinnaanngilaq, Martha Lund Olsenilli oqaatigaa aningaasanik immikkoortitsisoqartussaassasoq tamakkununnga atugassanut
