IKIORTARIALLIT Martha: Kalaallit arnat Danmarkimiittut danskit akisussaaffigaat
- Imatut oqartariaqarpugut naalagaaffeqatigiit iluanni isumaqatigiissuteqartugut, nunami najugaqarfigisami ikiorsiissutit aallaavigalugit ikiorsiisoqartarpoq.
- Qallunaat savalimmiormiullu nunatsinnut pisut maani ikiorneqartarput, taamaammat kalaaliugunik qallunaajugunilluunniit Danmarkimut pisut aamma Danmarkimi pissutsit aallaavigalugit ikiorserneqartussaapput. Isumaginninnermut nalaakkersuisoq, Martha Lund Olsen, KNR-imut taama oqarpoq.
Aamma atuaruk Nalunaarusiaq: Kinguaassiutitigut atornerlugaareersimanertik erloqissutigisaraat
Kalaallit arnat inooqataaniarnikkut ajornartorsiuteqartut allanit ajornartorsiornerusartut, Danmarkimi kommunit ikiorsiissutigisinnaasaat atorsinnaaneq ajoramikkit. Tamanna inooqataaniarnikkut ajornartorsiortut pillugit siunnersuisoqatigiit nalunaarusiaanni nutaami inerniliunneqarpoq.
Inooqataaniarnikkut ajornartorsiortut pillugit siunnersuisoqatigiit siulittaasuata Jann Sjursenip, kalaallit Danmarkimut nuuttut, assersuutigalugu kanngutsaaliorfigineqarnerminnik kingunerlutsitsisut, immikkut ittumik Iliuuseqarfiginissaat ujartorpaa. Danskilli isumaginninnermut ministeriata Karen Ellemannip isumaqatigingilaa oqarluni, inooqataaniarnikkut ajornartorsiortunut ikiorsiissutit pioreersut innuttaasutut allatulli atortariaqaraat.
Aamma atuaruk Ellemannip kalaallinut immikkut suliniutit aqqutissaasorinngilai
Iliuuseqarnerit pitsanngoriartorneri malunnartut
Nunatsinni atugarliortut iliuuseqarfigineqarneri Martha Lund Olsen naapertorlugu siuariarnikuuvoq, arnallu Danmarkiliaratik nunatsinniiginnarnissaat taassuma kaammattuutigaa.
- Nuukkusuttut nuunniissaannut soorunami inertersinnaanngilagut, maaniiginnarnissaannulli maani nunatsinni ikiorsiissutit pitsanngorsartuartariaqarpagut.
- 2013-mi naalakkersuisunngoramali tarnip pissusaanik ilisimasallit angalaqatigiit pilersinnikuuagut, massakkut holdit sisamaapput. Tassalu tarnip pissusaanik ilisimasallit 8-10-t nuna tamakkerlugu angalaartarput.
- Arnarpassuit kingunerlutsitsisut ullumikkut iliuutsigut assigiinngitsut atorlugit allanngortoqarneranik malussareerput. Ilaqutariinnut sullissiviit nukittorsarpagut, ajornartorsiuteqartut aamma pitsaasumik siunnersorteqartarlutik ikorfartorneqartarlutillu, Martha Lund Olsen taama oqarpoq.
Aamma atuaruk Kalaallit arnat pillugit ataatsimeersuarneq soqutigineqarluartoq
