Isumaginninnermut inatsiseqarnermullu Naalakkersuisup, Martha Abelsenip (S) Astrid Krag danskit isumaginninnermut nunamullu namminermut ministerertaavat sapaatit akunnerani kingullermi atuutilersoq siullerpaamik ataatsimeeqatigaa. Assi: Namminersorlutik Oqartussat

Isumaginninnermik susassaqarfik: Martha Abelsenip Danmarkimut kissaatai aajuku

Naalakkersuisut danskit naalakkersuisuinut kissaatitik, arfilinnik immikkoortullit tunniuppaat. Immikkoortut arfinillit Nunatta Danmarkimit isumaginninnermi ikiorneqarnissamik kissaateqarfiinut tunngapput.

Danskit naalakkersuisuinut ikioqqunissaq pillugu Inatsisartuni qaammatialunni oqallittoqangaatsiareertoq, pisortanut akerliussutsimik takutitsisoqareersoq, Asii Chemnitz Narup Kommuneqarfik Sermersuumi borgmesteritut tunuareersoq, isumaginnittoqarfillu qitiutillugu qineqqusaartoqareersorlu isumaginninnermut naalakkersuisup, Martha Abelsenip isumaginninnermut nunamullu namminermut ministerinngorlaaq erinigisaasumik sapaatip akunnerani matumani naapippaa.

Tamanna DR-ip isiginnaagassiaata “Byen hvor børn forsvinder”-ip aallakaatinneqarnerani Tasiilami meeqqat inuusuttullu atugarliungaatsiarneranik takutitsisoqarneranik aallaaveqarpoq.

Isumaginninnermut naalakkersuisup, Martha Abelsenip, danskit isumaginninnermut nunamullu namminermut ministerianik, Astrig Kragimik (S) aamma inatsiseqarnermut ministerimik Nick Hækkerupimik (S) Københavnimi sapaatip akunnerani matumani ataatsimeeqateqarnerani immikkoortut arfinillit nassatarai.

AAMMA ATUARUK Martha Abelsen danskit ministeriinik ataatsimeeqateqartoq

Danskit ministeriisa allattorsimaffik misissoqqissaarniaraat, Astrid Kragip DR-imut oqaatigaa.

- Kalaallit meerartaasa ajornartorsiuteqangaatsiartut ikiornissaannut ataatsimut akisussaaffeqarpugut. Naak susassaqarfigisara (isumaginninnermut susassaqarfik aaqq.) ukiorpassuarni nammineerusaagaluartoq ikiuuffiginissaa akisussaaffigalugu misigisimavunga, Astrid Krag oqarpoq.

Danskilli naalakkersuisuinut aalajangersimasumik suli isumaqatigiissuteqartoqanngilaq. Tamanna Martha Abelsenip tusagassiuutinut nalunaarummi uppernarsarpaa.

- Danskit ministeriinit tusaatissatut tiguneqarput, kingusinnerusukkullu tamanut pitsaanerpaamik qanoq aaqqiissuteqarsinnaanerup ujartornissaanut illuatungeriilluni oqaloqatigiinnissaq ingerlanneqassaaq.

Tassa Naalakkersuisut danskinik suliamut tunngatillugu ilisimasalinnik Nunatsinni kommunini suliamik isumaginninnermut ikiuuttoqarnissaa kommuninilu sulianik isumaginnittartut sanileralugit ilitsersorneqarnissaat pillugu ilaatigut piumasaqarput.

Suliamut tunngatillugu ilisimannittut sulianik isumaginninnerup ilaani aamma ilaassapput.

 

Naalakkersuisut Danmarkimut ikioqqussutaat

- Sulianut tunngasutigut sulisut, sulianik suliarinninnermi kommuninut ikiuuttussat, aamma kommunini sulianik suliarinnittartunik sanileralugit ilitsersuineq

- Isumaginninnermik suliallit katsorsaanermi suleqataasinnaasit

- Danmarkimi suliffeqarfiit arlallit suleqatiginerannik patajaallisaaneq, taamaalilluni neqeroorutit katsorsaanermillu suliniutit patajaallisarniarlugit, aamma Kalaallit Nunaanni periarfissanik piginnaasanillu pitsanngorsaaneq qulakkeerniarlugu 

- Suliniuteqarneq, meeqqanik atornerluisoqarnermi, pinngitsaaliilluni atoqateqartoqarsimatillugu aamma persuttaasoqarsimatillugu imaluunniit taakku pillugit pasitsaassisoqarsimappat taakku pillugit suliani sukkasuumik iliuuseqartoqartartoq innuttaasut misiginiassammassuk

- Pineqaatissiinermi sinaakkutinik atulersitsineq

- Eqqunngitsuliortartut pillarneqarneranni inooqataanikkut akuulersitseqqiisumik katsorsaaneq kiisalu eqqugaasut inatsiseqartitsinikkut inissisimanerannik patajaallisaaneq

Tamatuma saniatigut danskit kalaallillu suleqatigiissitat Nunatta Danmarkimit siunissami qanoq ikiorneqarnissaanik siunnersuusiortussanik pilersitsisoqarnissaa Martha Abelsenip kissaatigaa.

Tusarfik: Isumaginninnermut Inatsiseqarnermullu susassaqarfik

 

Tamatuma saniatigut isumaginnittarnerup pitsanngorsarnissaa kalaallillu isumaginninnermik suliaqartut piginnaanngorsarnerunissaat pillugu danskit suliffeqarfii assigiinngitsut qaninnerusumik suleqatigineqalernissaat Naalakkersuisut siunnersuutigaat.

Kinguaassiutitigut pinerliffigineqartut pinerliisullu ukkatarineqassasut

Kissaatinut allattorsimaffimmi kinguaassiutitigut naapertuilluanngitsuliornerit immikkut sammineqartut.

Tasiilami inuusuttut inersimasullu amerlasuut kinguaassiutitigut naapertuilluanngitsuliornerit pillugit oqartussanut unnerluutiginnissimagaluarlutik ikiorneqartannginnerat pillugu DR-ip isiginnaagassiaa piviusuinnik tunngaveqartoq, “Byen hvor børn forsvinder” upernaaq aallakaatinneqarpoq.

Meeqqanut atornerluisoqarnermi, pinngitsaaliilluni atoqateqartoqarsimatillugu, persuttaasoqarsimatillugu taakkuluunniit pillugit pasitsaassisoqarsimatillugu sukkasuumik iliuuseqartalernissamik Inatsisartut Naalakkersuisunut piumasaqareersullu, Nalakkersuisut Danmarkimit maanna ikioqqupput.

Tamatuma saniatigut pinerlineqartut inatsitigut pitsaanerusumik illersugaassasut allattorsimaffimmi allassimavoq.

Aammattaaq pinerluuteqartut pitsaanerusumik isumagineqassapput. Taamaammat pinerluuteqarsimasut pinerluuteqarsimasunut inissiisarfimmeereerunik inuiaqatigiinni pitsaanerusumik ingerlaqqinnissaat anguniarlugu inissiisarfimmiinneranni katsorsarneqarnerulernissaannut Naalakkersuisut ikioqqupput.

AAMMA ATUARUK Martha Abelsenip ikiuiniarnera kigaappallaarpoq

Namminersorlutik Oqartussat Danmarkimi Isumaginninnermik Aqutsisoqarfimmik suleqateqareerput. Naalakkersuisulli aalajangiisussaagunik danskit kalaallillu suleqatigiit Danmarkip Nunatsinni isumaginninnermut siunissami qanoq ikiuussinnaanera pillugu siunnersuuteqassapput.

Nunatta isumaginninneq tamaat 1980-imili akisussaaffigilerpaa.

AAMMA ATUARUK Meeqqat pillugit suliassaqarfimmi septembarimi aatsaat nutaanik suliniuteqartoqassaaq

Isumaginninnermut Inatsiseqarnermullu Naalakkersuisoqarfiup oqarnera naapertorlugu Naalakkersuisut meeqqanut sumiginnagaasunut iliuusissamik pilersaarummik inuiaqatigiillu peqqinnissaat pillugu suliniuteqarneq kiisalu ilaqutariinnut politikkimik ukiaru saqqummiiniarput.

Ilanngutassiaq DR Nyhederip suleqatigineratigut suliarineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat