DR-ip piviusulersaarutaata ”Byen Hvor Børn Forsvinder”-ip maajimi aallakaatinneqarnerata kingorna oqallinneq sakkortuseriaqqippoq.

IA: Martha Abelsenip ikiuiniarnera kigaappallaarpoq

Naalakkersuisut meeqqat inuusuttullu pillugit, Danmark ikiortiseralugu, ikiuiniarnerat kigaappallaaqaaq. Inuit Ataqatigiinneersut taama isornartorsiuipput.

Ilaqutariinnermut peqqissutsimullu ataatsimiititaliap isumaliutissiissut maajip 31-anni akueraat, Inatsisartuni amerlanerussuteqartut Danmarkimit ikiorneqarnissamik piumasaqareersullu.

Danmarkimili suli nutaanik naalakkersuisoqalinngimmat Naalakkersuisut Danmarkimut saaffiginnissuteqanngillat. 

Tamannalu pitsaanngitsoq, Ilaqutariinnermut Peqqissutsimullu ataatsimiititaliami siulittaasup tullia, Inuit Ataqatigiillu Inatsisartuni ilaasortaatitaat, Stine Egede, isumaqarpoq.

- Suliaq una pisariaqarpoq, kinguarsaqqittariaqanngilaq, suliassat utaqqipput, sulisut qasupput, ikiortariaqarput, Stine Egede oqarpoq.

Naalakkersuisut kommunini isumaginninnermut suliassaqarfiit, pingaartumik meeqqat inuusuttullu ikiortariallit, pillugit suliniarnerat kigaappallaartoq, taanna aamma isumaqarpoq.

Isumaginninnermut naalakkersuisup Martha Abelsenip erseqqissaatigereerpaa sutigut ikiorneqarnissamik kissaateqassagaanni tamanna tigussaasuusariaqartoq. 

AAMMA ATUARUK Meeqqat pillugit suliassaqarfimmi septembarimi aatsaat nutaanik suliniuteqartoqassaaq

Aamma oqaatigereerpaa ikiuinissamik nuna tamakkerlugu iliuusissat pillugit pilersaarusiami iliuusissanik pilersitsisoqarumaartoq.

Assigiinngitsuusut

Kisiannili nuna tamakkerlugu iliuusissat pillugit pilersaarusiaq immikkullu ikiuigasuarnissaq immikkoortuusut, Inuit Ataqatigiit oqarput. Pilersaarusiarmi ukiakkut ataatsimiinnermi kingullermili akuersissutigineqareerpoq Inatsisartullu Naalakkersuisut ikiuinissaannik piumasaat maannakkorpiaq iliuuseqarfigineqartariaqartoq.

Ilaqutariinnermut peqqissutsimullu ataatsimiititaliap kaammattuutigaa Naalakkersuisut kommuninik oqaloqateqarnerminni misissuinerminnillu danskit naalagaaffiat suleqatigilereersinnaagaat.

Tamanna itigartitsissutigineqareerpoq, Naalakkersuisut Danmarkimut sutigut ikioqquneqarnissartik ilisimaqqaartariaqaraat tunngavilersuutigalugu.

- Kommunit tamaasa oqaloqatigissavaat sunik pisariaqartitsisoqarnersoq qanorlu annertutiginersoq paasiniarlugu. Taannalu pereerpat isikkussavia, qallunaat naalakkersuisuilu, isumaqatigiissutigineqassaaq, Ilaqutariinnermut Peqqissutsimullu ataatsimiititaliami siulittaasup tullia Stine Egede oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat