Inunnik isumaginninnermi suliassaqarfik sapaatit akunnerini tallimani nipituuliutigineqarlunilu oqallisigineqarpoq. Tigussaasumilli suli suliniutissaqanngilaq. Assiliisoq: KNRAssi: Foto: KNR

Martha Abelsen: Meeqqat pillugit suliassaqarfimmi septembarimi aatsaat nutaanik suliniuteqartoqassaaq

Naak sapaatit akunnerini arlalissuarni oqallittoqareeraluartoq Naalakkersuisut meeqqanik kinguaassiutitigut atornerluisoqartarnerata akiorniarneqarnissaanut suliniutissanik nutaanik ukiaru aatsaat saqqummiussiniarput.

Isumaginninnermut naalakkersuisoq Martha Abelsen (S) ”Isumaginninnermi suliat killiffii” qulequtaralugu tusagassiortunik katersortitsinermut pingasunngormat aggersaavoq.

Isumaginninnermut suliassaqarfiup, pingaartumillu meeqqat inuusuttullu ikiortariallit pillugit, sapaatit akunnerini tallimani annertuumik oqallittoqareersoq tusagassiortunik katersortitsivoq.

Danmarkip Radioata piviusulersaarutaata ”Byen Hvor Børn Forsvinder”-ip maajip arfernani aallakaatinneqarnerata kingorna oqallinneq sakkortuseriaqqippoq, sammineqartorlu annertuunik kinguneqartinneqarluni. Kingullertullu, Kommuneqarfik Sermersuumi ukiuni kingullerni borgmesteriusoq Asii Chemnitz Narup (IA) Demokraatinit tatigineqarunnaarnermi kingorna borgmesteritut tunuarpoq.

Aammattaaq Inatsisartuni partiit amerlanerussuteqartut Naalakkersuisut maajip 24-ani peqquaat isumaginninnikkut suliassaqarfimmut Danmarkimit ikiorneqarnissamik noqqaassuteqaqqullugit. Sapaatit akunnerallu ataaseq qaangiummat, Kim Kielsenip allattaa Eqaluk Høegh tamanut ammasumik uissuummissutigineqartumillu atorfimmit tunuarpoq, tamatumunngalu peqatigitillugu sulisitsisorisimasani meeqqat pillugit suliassaqarfimmik sumiginnaasimasutut isornartorsiorpaa.

Tasiilami kinguaassiuutitigut innarliinerit

Tasiilami pigisaanilu kinguaassiuutitigut pinerliinerit ukiut pingasut kingulliit ingerlaneranni 193-it nalunaarutigineqarput.

Meeqqanut kinguaassiuutitigut atornerluinerit 20-t siorna nalunaarutigineqarput.

Tasiilami pigisaanilu meeqqanut kinguaassiuutitigut pinerluttuliornerit 15-it maanna suliarineqarput.

Meeqqat illersuisuata aamma nalunaarutigaa nalunaarutigineqarsimanngitsut amerlasoorujussuusut.Agguaatigiissillugu meeqqat pingasuugaangata ataaseq kinguaassiutitigut atornerlugaasarpoq, meeqqallu marluugaangata ataaseq kommunemi isumaginninnikkut suliassaasarpoq.

Pingasunngormalli tusagassiortunik katersortitsinermi suliniutissanik tigussaasunik saqqummiussisoqanngilaq. Martha Abelsenimi isumaqarpoq suliniutit ingerlareersut sivisuumillu ingerlanneqareersut.

- Tasiilamut tunngatillugu suliniuterpassuit ingerlanneqareerput. Namminersorlutik Oqartussat namminneq suliniutigisaat imaluunnit Kommuneqarfik Sermersooq peqatigalugu, kommunimi innuttaasunut meeqqanullu ataasiakkaanut tunngaviatigut akisussaasuuvoq, naalakkersuisoq oqarpoq nangillunilu:

- Suliassamik kivitsinissamut ikiorneqarnissamik Danmarkimut noqqaassuteqaqqusaanitsinnut tunngatillugu, innuttaasut peqataatinneqarnissaat pingaaruteqartupilussuuvoq. Qulaatiinnarlugit ima oqarnissarput naammanngilaq: Naliliinerput naapertorlugu uku ukulu pisariaqartippasi.

Danmark suli saaffigineqanngitsoq

Naalakkersuisullu Danmarkimut suli saaffiginnissuteqarsimanngitsut Martha Abelsenip ilanngullugu oqaatigaa, tamatumunngalu pissutaasut marluupput. Siullertut, qinersinerup kingorna Danmarkimi suli naalakkersuisoqalinngilaq. Aappaattullu, sutigut ikiorneqarnissamik noqqaassuteqarnissaq paasiniarlugu Naalakkersuisut suli suliaqarput.

Suliniutissat nammineerlusi isumagisinnaasasi pineqarput. Soorlu assersuutigalugu eqqaavat nuna tamakkerlugu iliuusissat pillugit pilersaarusiorlusi. Innuttaasut piaartumik iliuuseqarnissassinnik utaqqikatattut qanoq oqarfigerusuppigit?

- Immikkut ittumik suliniutissat suussanersut kommunit peqatigalugit erseqqissartariaqarpagut. Borgmesteri (Asii Chemnitz Narup, aaqq.) immikkut ittumik ataatsimeeqatigereerpara, aamma borgmesterinngortoq (Charlotte Ludvigsen, aaqq.) ataatsimeeqatigisussaavara, naalakkersuisoq oqarpoq imalu itisiliilluni:

AAMMA ATUARUK Borgmesteri Tasiilaq pillugu: Naalakkersuisunut ikioqqugatta itigartitaavugut

- Akisussaaffik avinneqartussaavoq. Kommuni sapinngisarput tamaat tapersersorparput. Kommunip ajornartorsiutigisaa tassaavoq suliassat pingaarutillit ilaannut aalajangersimasumik atorfilinnik sulisussarsinissaq, taamaammat kommunit suliassamik sukkanerusumik pitsaanerusumillu kivitsinissaannut qanoq iliortoqarsinnaanersoq aaqqiissutissarsiffiginiarsarivarput.

Kommunip immikkoortumut pisortaata Hjørdis Vibergip maajip naalernerani oqaatigaa Tasiilami isumaginnittoqarfimmut suliassanngortinneqartut hunnorujulippassuit isumaginissaannut inunnik isumaginninnermi siunnersortinik tarnillu pissussaanik immikkut ilisimasalinnik pisariaqartitsisoqartoq.

Pineqartoq naatsumik
- DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
- Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
- Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
- Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaart piumasaqaatigaat. - Taamatut piumasaqaateqartoqarnera Naalakkersuisut mtaasinngornermi maajip 27-ani akueraat.

Qanoq pilersaarnissinnik nalunaarutigisassi ilaasa piviusunngortinnissaannut qaqugu piariissasorivisi?

- Pilersaarut una (meeqqanik inuusuttunillu sumiginnaasarnerup akiorniarneqarnissaanut iliuusissat pillugit nuna tamakkerlugu pilersaarut, aaqq.) Inatsisartut noqqaassutigisaattut ukiaanerani ataatsimiinnermi saqqummiunneqartussaavoq.

AAMMA ATUARUK Immikkoortortaqarfimmi Tasiilami pisortap suliniut ilassilluaraat

Suliniutissanik tigussaasunik saqqummiussassaqarnak, qanorli pilersaarnissinnik nalunaarutinik saqqummiussillutit tusagassiortunik katersortitsininni suna takutinniarsariviuk?

- Naalakkersuisunit periarfissaqanngilagut innuttaasut tamarluinnaasa toqqaannartumik oqarfigissallugit imatut imatullu pisoqassasoq. Tamanna kommunalbestyrelsit, borgmesterit innuttaasunillu attaveqarnissamut pingaarnertut akisussaasut peqatigalugit suliassaavoq. Sutigut ikiorneqarnissamik noqqaassuteqartoqassanersoq erseqqissarneqareerpat saaffiginnissaagut.

Inatsisartuni amerlanerussuteqartut 2018-imi upernaakkut ataatsimiinnermi aalajangerput meeqqanik inuusuttunillu sumiginnaasarnerup akiorniarneqarnissaanut iliuusissat pillugit nuna tamakkerlugu pilersaarusiortoqassasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat