Isumaginninnermi susassaqarfik Martha Abelsen danskit ministeriinik ataatsimeeqateqartoq
Meeqqanut inuusuttunullu suliassaqarfimmi isumaginninnikkut unammiligassat, danskit kalaallillu akornanni suleqatigiinneq, tamassumalu qanoq iliornikkut annertusarneqarsinnaaneranut kissaatit, ataatsimiinnerni oqaluuserineqarput.
Danskit oqartussaasuinut pisortatigoortumik saaffiginninnerup nammineerluni ataatsimeeqatiginninnikkut ingerlanneqarnissaa, Naalakkersuisunut ilaasortap Martha Abelsenip pingaaruteqartutut isigisimavaa.
- Saaffiginninnerup nammineerluni ataatsimeeqateqarnikkut pinissaa uannut pingaaruteqarpoq, taamaalilluni apeqqutit pissusissamisut apeqqutigineqarumaartut akinissaat periarfissaqassammat, Naalakkersuisunut ilaasortaq Martha Abelsen oqarpoq.
Naalakkersuisut isumaginninnermut suliassaqarfimmi ikiorneqarnissamik noqqaassuteqarlutik danskit naalagaaffiannut saaffiginnissuteqassasut, Inatsisartuni partiit amerlanerussuteqartut ukioq manna maajip naalernerani sakkortuumik kaammattuutigineqarpoq.
DR-ip piviusulersaarutaa "Byen hvor børn forsvinder" Tasiilamut tunngassuteqartoq DR-ikkut aallakaatinneqareersorlu nunatsinni oqallittoqangaatsialerpoq, Martha Abelsenilu danskit ministeriinik maanna tassa ataatsimeeqateqaqqammerpoq, ikiorneqarnissarlu qanoq aaqqissuunneqassanersoq maanna apeqqutaaginnalerpoq.
- Danskit ministeriinik nutaanik pitsaaqisunik ataatsimeeqateqarsimavunga. Kalaallit danskillu oqartussaasuisa akornanni qanittumik suleqatigiinnerup nanginneqarnissaa isumaqatigiissutigineqarpoq, Martha Abelsen oqarpoq.
Danskit ministeriinut nutaanut taakkununnga pisortatigoortumik immikkut ittumik saaffiginninnerup saniatigut meeqqanut inuusuttunullu suliniutit pilertornerusumik ingerlanneqarnissaat Naalakkersuisut sulissutigaat, nunatsinnimi meeqqat inuusuttullu iliuuseqartoqarneranik misigitinneqartariaqarmata.
