Marlunnik universitet-eqalernissaq akerlerilluinnarpaat
Ilisimatusarfik marlunngorlugu avinneqarpat marlunnillu allaffeqarfeqalerpat, tamanna aningaasanik atuinerlunneruvoq, taama isumaqarput Demokraatit, taakkumi aningaasanik atuilluarniartuupput.
- Siunertaagaluarpoq Ilisimatusarfik tamaat ataatsimut isigalugu, taanna ataasiinnaassasoq, siunertaalluni aningaasat atorsinnaasat atorluarneqarnissaat. Maannalu tassa immaqa Ilimmarfik marlunngorlugu avinniarneqalerpoq. Uangulli isumaqarpugut, Ilimmarfik aningaasanik atorsinnaasanik qanoq atorluartigisinnaanersoq piffissalerneqartariaqartoq, Demokraatit ilinniartitaanermut oqaaseqartartuat, Michael Rosing oqarpoq.
Ilisimatusarfiup marlunngorlugu avinneqarnissaanik oqalunneq maanna piffissaanngitsoq, Siumukkormiut isumaqarput. Taakku isumaqarlutik nutaamik ilinniartitaanermut pilersaarusiq tunngavilersorluagaanngitsoq.
- Ilisimatusarfiup marloqiusanngorlugu avinneqarnissaa tunngavilersuuteqanngilaq, isummersussagaannilu tunngavissaalatsilluta isummersinnaanngilagut. Inatsisartunut suliakkiutigineqarsinnaanngilaq nalunaarusiaq taama pingaaruteqartigisoq, sooq Ilisimatusarfik avinniarneqarnersoq, Aleqa Hammond oqarpoq.
Ilisimatusarfiup aqutsisoqarneranut inatsit, Ilisimatusarfimmik sinaakkusiisoq, 2008-mi atuutilerpoq.
Ilisimatusarfimmik naliginnaasumik aamma ilisimatusarfimmi atuareernermi toqqaannartumik sulilernermut ilinniakkanut ilisimatusarfimmik, qallunaatut taallugu professionsuniversitetimik, pilersitsinissaq illumili ataasiusumi allaffeqarfiilli marluusut, Ilinniartitaanermut Naalakkersuisup tunngavilersuutigai, taamaalilluni ilinniarnerit nukittorsarneqassammata nunarsuatsinni allani periutsinut assigusunngorlugit.
Ilinniarfiit avinnagit allatut aaqqiisoqarsinnaasoq, Inuit Ataqatigiinneersoq, Hans Aronsen isumaqarpoq.
- Uagut isumaqaratta periarfissanik annertusaanissaq ajunngitsoq, soorlu bachelorimiit kanditatimut ingerlaqqinniarnermi periarfissiisoqarsinnaaguni. Assersuutigalugu nunani allani universitetini ilinniarnerni nunani tamalaani pointilersueriaaseq naapertorlugu aaqqissuussisoqarsinnaavoq, taannalu taaneqartarluni ECTS-imik, tamannalu atorlugu ineriartortitsisoqarsinnaavoq, Inuit Ataqatigiit oqaaseqartartuat, Hans Aronsen oqarpoq.
Avitsiniarnermi suut iluaqutaasut ajoqutaasullu nalilersorneqaqqaassasut, Ilinniartitaanermut Naalakkersuisup, Palle Christiansenip naqissuserpaa.
- Apeqqutaalluinnarpoq tamassuma qanoq imminut akilersinnaatiginera. Ilinniakkat qanoq akilersinnaatiginerat paasiniarluartariaqarpavut, ilinniakkat uagutsinnut qanoq iluaqutaatigippat?... Ilisimatusarfiup marlunngorlugu avinneqarnerani ilinniakkat assigiinngitsut ukkatarilertussaavagut. Tamassuma nassatarissavaa ilinniarneq pitsaanerusoq ilinniartullu naammassisartut amerlanerit. Tassa aningaasaliiluarneq, Ilinniartitaanermut Naalakkersuisoq, Palle Christiansen oqarpoq. Taassuma ilanngullugu oqaatigaa, Ilisimatusarfiup avinneqarnera qanoq akeqassanersoq suli naatsorsorneqanngitsoq.
Ilisimatusarfik naliginnaasup saniatigut aappaani ilinniagaasinnaasut tassaassagaluarput ilinniartitsisunngorniat, Inunnik Isumagittunngorniat, Peqqissaasunngorniat, Tusagassiortunngorniat nutserisunngorniallu.
