Maren Olsen: Tammatsaaleeqataanissara pingaartittorujussuuara
Kalaallisuuliornermi suliat tammatsaaleeqataaffiginiarlugit arnanut mersortareersunut mersortalerusuttunullu neqerooruteqartoq tassaavoq kalaallisuuliortartoq Maren Olsen.
Tamannalu Kangaatsiami pinaveersaartitsinermik suliallit ataani Timi Tarnilu suleqatigalugit pivoq, marsillu 15-iani aallartinneqarluni.
-Aallartitsininnut siunertaavoq Kangaatsiami ammerinermik ilisimasalimmik peqartoqaannarnissaa. Massakkut ammerisinnaasut utoqqalillutik mersorsinnaajunnaarnikuugamik, Maren Olsen oqarpoq.
Taanna Niaqornaarsummiuuvoq, uinikkamili Kangaatsiamut nuunnikuulluni. Ulluinnarni meeqqerivimmi sulisarpoq, angerlaraangamilu ammerinermik ingerlataqartuaannarnerarpoq.
-Sulinerma saniatigut angerlarsimaffinni ammerineq ingerlattuaannarpara. Arnanut kalaallisuuliornermut ilikkarusuttunut aaqqissugassaqaraluarlutilluunniit nalornilertunut neqeroorutiga soqutigineqarluarmat nuannaarpunga, oqarpoq oqaatigalugu arlallit soqutiginnillutik takkussimasut.
Pisariuvoq
Kalaallisuuliorneq pisariusoq Maren Olsenip ilanngullugu oqaatigaa, tassami puisip amia aallaqqaataaninngaanniit qapiarneqaqqaartarpoq, qaqquarseqqaarlugu, qaqquareerpat kinillugu, taatsitassaappallu taatseqqaarlugu, kingornalu unniliornermut tungujorsialiornermullu atorneqartarluni.
-Tamakku tamarmik nukinnik atuiffiupput, taamaammat tammatsaaliinissaq pingaarutilerujussuuvoq. Misigisimagama allanik utaqqisaqarnanga tammatsaaleeqataassaguma aallartittariaqarlunga, Maren Olsen oqarpoq.
Kangaatsiami kalaallisuuliornermik ilinniartitsineq Katersortarfimmi arfininngornikkut ualikkut nalunaaqutaq ataatsimiit pingasunut ingerlanneqartarpoq, aggerusuttunullu tamanut ammasarluni.
