Jens-Frederik Nielsen: Ikummatissaq akitsunngikkutsigu aningaasatigut ajornartorsiulissaagut
KNI-p ikummatissat imerpalasut ullormiit ullormut marlunngormat 85 oorimik akitsorpai. Tamanna 15-mit 20 procentimut akimik qaffaanerunerup naligaa.
Akitsuineq Naalakkersuisut akuereqqaaraat, KNI KNR-imut sapaatip akunnerani matumani paasissutissiivoq.
KNI-p sinneqartoorumminit ikummatissap akikinnerunera akilersornikuuaa. Aningaasat taakkua maanna nungutut ingerlatseqatigiiffimmit siusinnerusukkut nassuiaasoqarpoq.
Aningaasat taakkua nungoreertut akit akikinnerutiinnarneqaraluarpata tamanna nunap karsianut ukiumut millioninik 130-inik akeqassasoq, Naalakkersuisut siulittaasuat oqarpoq. Taamatulli inuiaqatigiit aningaasaataat atorumaneqanngillat.
- Taamaammat aningaasanut inatsit qiviarutsigu ukiunut sisamanut 500 million sinnerlugu akeqartussaavoq. Taamaammat aningaasaliiffigineqassasuuppat aningaasaqarneq qiviaraanni soorunami annertoorujussuarmik nammakkersuissooq, Jens Frederik Nielsen oqarpoq.
Akisussaasoq oqaatigiumanngikkaa
KNR-ip Naalakkersuisut siulittaasuat ikummatissat imerpalasut nunatsinni 20 procentip tungaanut akitsornerannut kina akisussaanerpaanersoq apeqqutigaa. Apeqqulli arlaleriarluni apeqqutigineqaraluartoq tigussaasumik akineqanngilaq. Naalakkersuisulli naggataani akuersisuussasut oqaatigineqarpoq.
- Orsussap akia allanngortinneqassappat naalakkersuinikkut akuerineqartussaavoq, Jens Frederik Nielsen oqarpoq.
Siulittaasoq: Paasinnippunga
Ikummatissanik imerpalasunik akitsuineq nuannaarutigineqanngitsorujussuuvoq. SIK-p siulittaasuata, Jess G. Berthelsenip, akitsuineq qinersisartunik salloqittaanertut nalilerlugu KNR-mut siusinnerusukkut oqaatigaa. Taama oqarnermini Inatsisartunut upernaaq qineqqusaarnermi inuuniarnerup oqinnerunissaa qineqqusaartunit tamanit qineqqusaarutaasoq tunngavilersuutigaa.
Naalakkersuisut siulittaasuat isornartorsiorneqarnerminut paasinnippoq
- Partiit tamaavimmik qineqqusaartut oqariartuutigivaat sapinngisaq tamaat nunatsinni inuuneq akikinnerusariaqartoq oqinnerusariaqartorlu. Taannalu isumaq attanneqarpoq. Uanili pineqarpoq nunatta avataani niuffaffiillu akii uagut aqussinnaanngisagut. Taamaammat uanga Jess G. Berthelsenitut ajuusaartigivunga uunga killittariaqarsimanitsinnut, Jens Frederik Nielsen oqarpoq.
