Borgmesteri: Internet akikillippat kiserliorneq minnerulissaaq
Qeqqata Kommuniata kommunalbestyrelsianut qinikkat marluk, Siumumeersut, tassa Malik Berthelsenip Hans Frederik Olsenillu paasinninnerat naapertorlugu qangaanerusumut sanilliullugu ilaqutariittut ataatsimoortarnerit annikillipput.
Tamanna utoqqarnut inunnullu innarluutilinnut pitsaanngisumik kinguneqartoq taakkua isumaqarput. Kiserliortoqalersimaqisormi kommunimut qinikkat isumaqarput.
- Ukiuni kingullerni nunatsinni utoqqaat aammalu innarluutillit akornanni ajornartorsiutit ilaat tassaalersimavoq kiserliorneq. Aammalu tamatta takorloorsinnaavarput kiserliorneq inunnut pineqartunut misigissutsikkut eqqarsartaatsikkullu pinngitsoorani sakkortusimassasoq, Qeqqata Kommuniani borgmesteri, Malik Berthelsen KNR-mut oqarpoq.
Aliikkutassaqartitsisoq
Tamassumali allanngornissaanut isumassarsiaqarput. Tassa internetsip akia utoqqarnut inunnullu innarluutilinnut akikinnerulissasoq.
- Tamatta nalunngilarput internetsi sorpassuarnik imaqarsinnaasoq. Assersuutigiinnarlugu aliikkutassiat, imaluunniit ilaquttanut attaveqarsinnaanermut atorneqarsinnaavoq. Taamaammat upperivarput internetsi sorpassuartigut utoqqarnut inunnullu innarluutilinnut, ingammik angerlasimaannartunut, annertuumik iluaqutaasinnaasoq, susassaqartitsinermut aliikkutassaqartitsinermulluunniit, Malik Berthelsen oqarpoq.
Attaveqaatilli atorlugit attaveqarnerit naliginnaasumik inuit naapillutik attaveqartarnerannit allaanerusoq borgmesterip erseqqissaatigaa.
Tusassimut innersuussisoq
Tusassimi internetsimut atuisuuffik akikinnerpaaq qaammamut 499 koruuneqarpoq.
Tamannali kommunimut qinikkat taakkua akisugaat. Qanorli akeqartariaqaraluarnera borgmesterip oqaatigiumanngilaa.
- Isumaqarpunga tamanna immaqa Tusassimi aqutsisut siulersuisullu nalilersorsinnaagaat, Malik Berthelsen oqarpoq.
Internetsip utoqqarnut inunnullu innarluutilinnut akikillinissaa suliffeqarfissuup nammassinnaassagaa qinikkat isumaqarput. Taakkua Tusassip sinneqartoorutigisartagaanut innersuussipput. Tusass akileraareerluni 2023-imi 124 millionit koruuninik sinneqartoorpoq.
Saaffiginnittut
Malik Berthelsenip Hans Frederik Olsenillu internetsip akikinnerulernissaanik kissaateqarnertik Naalakkersuisut siulittaasuannut, Jens-Frederik Nielsenimut, aamma isumaginninnermut, suliffeqarnermut, nunamut namminernut avatangiisinullu naalakkersuisumut, Bentiaraq Ottosenimut allakkatigut apuuppaat.
Naalakkersuisoqatigiit isumaqatigiissutaanni utoqqaat kiserliortarnerat annikillisarniarlugu neqerooruteqarnissaq aallunneqassasoq isumaqatigiissutaavoq.
