Maqaasineqartut suli nassaarineqanngitsut – Issittumi Sakkutooqarfiup ujaasiffitsik annertusigaat

Angutit pingasut Qeqertamiit Ilulissanukarlutik arfininngormat aallarput, sulilu tammaaneqarlutik. ANgutit Ilulissanut ataasinngormat tikittussaagaluarlutik suli tikinngillat.

Issittumi Sakkutooqarfik ujaasisoqalermalli ujaasilerpoq, nassaarinagilli. Illersornissaqarfiup ujaasiffigineqartoq maanna annertusigaa, Issittumi Sakkutooqarfik Facebookikkut allappoq.

Nutaanik paasissutissiisunik saaffiginnittoqarpoq.

Umiarsuaq alapernaarsuut, Lauge Koch, illersornissaqarfiup timmisartua Air Greenlandimiillu qulimiguulik ujaaseqataapput. Lauge Koch Qeqertap Ilulissallu akornanni ujaasiinnassaaq. Illersornissaqarfiullu timmisartua kitaanuunerusoq kujataaniinnerusumullu ujaasissaaq, timmisartumik ujaasineq qulit missaani aallartissangatinneqarpoq.

Oqartussat maqaasineqartunik pingasunik ulloq unnuarlu ujaaseqataasut tamarmik qujassuteqarfigai.

Angutit pingasut Pocami qaqortumi Suzukimik 225 hk-ilimmik aquuteralalimmi issimasuupput.