Atassutip qinigassanngortitai partiimiiginnarnissaminnik neriorsuuteqassasut

Atassummi ilaasortaasimasut partiimut allamut nuuttarnerat Inatsisartuni qinigaaffiup nalaani Atassutip ataasiarani nalaappai.

Knud Kristiansen siullermik Siumumut nuuppoq, tamatumalu malitsigisaanik Mala Høy Kuko aamma Siumumut nuulluni, taamaalilluni Atassut Inatsisartuni ilaasortaatitaarutivippoq.

Tamannali unitsinniarneqarpoq.

Atassut sinnerlugu sassarniaraanni taava Atassummiiginnarnissaq pillugu atsiortoqartariaqarpoq, Atassummi siulittaasup tullia, Qulutannguaq Berthelsen oqarpoq.

- Atassummit kissaatigaarput, Inatsisartuni Atassut tunuliaqutaralugu ilaasortaaffiusussaammat, Qulutannguaq Berthelsen oqarpoq.

Taamaattumik Atassut sinnerlugu qineqqusaartussat partiimiiginnarnissaat anguniarlugu nutaamik periuseqartoqartussanngorpoq.

- Isumaqatigiissut naapertorlugu, Atassummiit tunuaruit imaluunniit partiimut allamut nuukkuit, taava Inatsisartuni ilaasortaaffiit annaassavat, taamaalilluni Atassummit sinniisussaq Inatsisartunut ilaasortanngortinneqartalissaaq, Qulutaannguaq Berthelsen oqarpoq.

AAMMA ATUARUK Aaja Chemnitz Larsen Inatsisartunut qineqqusaassanngilaq

Qulutannguaq Berthelsenip neriuutigaa, Atassut sinnerlugu ilaasortat partiimut allamut nuunnatik  partiimiiginnartarnissaat, Inatsisartunimi qinersinermi kingullermi Atassut marlunnik ilaasortaatitaqartoq
naggataatigut ilaasortaatitaarutivippoq.

- Imaassanngilarmi partiip iluani isumaqatigiinngitsoqarpat taava partiimut allamut nuuttoqartassasoq, Atassummi siulittaasup tullia, Qulutannguaq Berthelsen oqarpoq.

Inuit isumasiorneqarnerat naapertorlugu ullumikkut qinersisoqartuuppat - Atassut qinersinermi ataatsimik ilaasortaatitaqalersinnaavoq.

AAMMA ATUARUK IA aamma Siumut naligiipajaartut