Aaja Chemnitz Larsen Inatsisartunut qineqqusaassanngilaq
Ane Hansen Kommune Qeqertalimmi borgmesteritut qinigaammat Aaja Chemnitz Larsenip Inatsisartunit sulinngiffeqarnini taamaatillugu Inatsisartuneeqqilerpoq.
Qinigaaffinnilu marlunni kilometerinik tusindilippassuarnik ungasitsigisuni issianissaq imminnut ataqatigiinngitsoq ukiup affaa sulereernermini paasivaa.
- Inuit Ataqatigiit sinnerlugit folketingimi ilaasortaaffinni nukissakka atorniassagakkit qinigassanngortissananga aalajangernera oqitsuinnaasimanngilaq, Facebookimi allappoq.
Folketingimi sulinermini sunniuteqarnerusinnaalluni taanna isumaqarpoq.
Danmarkimi Folketingimut qinersinissaq tulleq 2019-imi junimi kingusinnerpaamik pisussaavoq, Aaja Chemnitz Larsenillu qinigassanngorteqqissanerluni oqaatigerusunngilaa.
- Folketingimi sulinera nuannarisorujussuuara, qanorlu pisoqarumaarnera paasinarsiumaarpoq. Kalaallit Nunaalli pillugu sunniuteqarsinnaalluarnera nuannaraa, KNR-imut oqarpoq.
Inatsisartunullu qinersinissatsinnut qineqqusaarnermi ikiuutissaaq, tassani Sara Olsvigip qinerneqarnerpaanissaa anguniassallugu.
2014-imi Inatsisartunut qinersinermi Aaja Chemnitz Larsen 278-inik qinerneqarpoq, Inuit Ataqatigiinnilu taaguunneqarnerpaat sisamaattut inissilluni. Folketingimilu qinersinermi 2541-nik qinerneqarpoq.
