Maliina: Innuttaasut kaasarfii imaajanngilagut

Naalakkersuisut akitsuutinik qaffaanerisigut, innuttaasut arlaatigut iluaquserneqaratik aningaasaataarutsinneqarnissaannik, Siumup siulittaasuata Aleqa Hammondip oqaasia, Aningaasaqarnermut naalakkersuisup Maliina Abelsenip eqqunnginnerarpaa.
Allattoq Elisa Isaksen
novembarip 11-at 2011 06:15

- Nutaanik akitsuusiisarneq nuannerneq ajoraluartoq, aningaasat innuttaasunut uteqqittarput soorlu peqqissutsimut tunngasunik sullissinerit pitsanngoriarnerisigut, siusinaartumik pensionisiat qaffannerisigut aamma meeqqanut inuusuttunullu sullissinerit annertusarnerisigut. Tassanimi pineqarmat ataatsimoorluta aningaasaatitsinnik pitsaanerusumik agguaasseqqinneq, Maliina Abelsen erseqqissaavoq.

Taassuma innersuussutigaa, Naalakkersuisut akitsuutissanik qaffaanerini, tamatigut avatangiisit isumaginninnerlu eqqarsaatigalugit attanneqarsinnaanissaat  anguniarneqartartoq.

- Ukiup tullianut aningaasanut inatsisissatut siunnersuummut atatillugu raajanut poortuutissanullu akitsuutit qaffannerisigut, Nunatta karsianut ukiumut 50 millionit koruuninik isertitsissutaanissaat siunnersuutigineqarpoq. Atugarissaarnerup aningaasalersornissaa eqqarsaatigalugu tamanna pisariaqarpoq, Maliina Abelsen oqarpoq.

Taassuma ilanngullugu oqaatigaa, Naalakkersuisut nutaanik akitsuusiinermikkut akileraarutit qaffannginnissaat anguniaraat, tamatumunngalu peqatigitillugu Nunatta Karsia imigassanit sikaritsinillu akitsuutinit isertitakinnerulermat. Pissutsit taamaalinerat nuannaarutissaagaluarpoq, kisiannili naatsorsuutit oqimaaqatigiittariaqartut Maliina Abelsenip erseqqissaatigaa.