Maleruagassat ingasagai
Europami timmisartoqarfiit isumannaallisaanissamut nutaanik amerlalluinnartunik maleruagassaqalersimapput, peqqarniisaartoqarnissaa pingaartumik pinngitsoortinniarneqarluni, allaammigooq tamanna ingasagineqarsinnaavoq. Taama isumaqarpoq Københavnimi mittarfeqarfiit pisortaanerat, Niels Boserup.
Peqqarniisaarluni saassussinissamut inuiaqatigiit qanoq upalungaarsimasinnaanerannut apeqqut politikerinut oqartussaasunullu Niels Boserupip eqqarsaatigillaquaa.
- Suna pisariaqartinneqarnersoq eqqissilluni ingilluni sumiiffinni allani sukumiisumik naatsorsoqqissaarneqartarpoq oqaluusereqqissaarneqarluni. Isumaqarpunga suut mianersorfigisariaqarnerat upalungaarsimaffigineqarnissaallu aallaqqaataaniit aallartilluta eqqartortariaqaripput, nukiillu tassunga atorlugit, Niels Boserup oqarpoq.
- Maannakkutut iliortuassagutta, pissutsit immaqa imaalissapput, arnat bikiniinnanngortillugit angutillu qarleeraannanngortillugit misissuivigineqartalerlutik, Danmarkimi mittarfeqarfinni pisortaaneq oqarpoq.
