Mælkebøttencenterip immikkoortortaqarfissaata ammarnissaa kinguaattoortoq

1.september var åbningsdagen for den nye boenhed Aili. Den dato er udskudt på ubestemt tid, fordi byggeriet stadig er i gang.

Najugaqatigiiffik nutaaq Aili septembarip aallaqqaataani ammartussaagaluarpoq. Ullorli taanna piffissamut ilisimaneqanngitsumut kinguartinneqarpoq, sulimi sanaartortoqarpoq.

Mælkebøttencenter meeraaqqanut ulloq unnuarlu inissiisarfimmik siullerpaamik ammaalerpoq. Tassani meeqqat 0-init pingasunik ukiullit arfineq-pingasut inissaqartinneqassapput.

- Meeqqat attaveqaataasa peqqissuunissaat pingaarnertut qitiutillugu aalluttussaassavarput. Avatangiisit aalaakkaasut, isumassuisumik asannittumillu paaqqutarineqartussaassapput. Angajoqqaat meeqqat naalungiarsuit pisariaqartitaannik matussusiisinnaanersut aamma nalilersuissaagut.

Najugaqatigiiffimmi pisortaq, Arnajaraq Hammeken, KNR-imut oqarpoq.

Najugaqatigiiffik Aili meeraaqqat ineriartornerminni toqqissisimanerminnillu ajornartorsiuteqalernissaannik pinaveersaartitsinermik sunniuteqassaaq.

Sulisut piginnaasaat qaffasissuussasut

Immikkoortortamilu sulisut meeraaqqanik atugarliornermi inissisimasunik sullissisussaammata sulisut piginnaasaasa ineriartortittuarneqarnissaat Mælkebøttencenterip immikkoortuani pisortap pingaartippaa.

- Sulisut ilisimasaannik qaffassaalluni ilinniartitseqqinnissaq pingaartittorujussuuarput – soorlu naap iluaniinnerani sunniutit aamma inunngornerata kingorna qanoq tapersersorneqassanersoq, Arnajaraq Hammeken oqarpoq.

Immikkoortortaq nutaaq inunnut perorsaanermik sunniuteqartumik ingerlanneqassaaq, tassanilu meeqqat angajoqqaavialu kiisalu ilaqutarsiaasinnaasut katsorsarneqarsinnaasut, Arnajaraq Hammeken oqarpoq.

Najugaqatigiiffiup angajoqqaat katsorsaanerup ingerlanerani tamarmi peqataaniassammata ilanngutitinneqarnissaat kissaatigigaa taassuma KNR-imut aamma oqaatigaa.

- Angajoqqaatik ilaginagit tassani najugaqassapput, kisianni pingaartitatta ilagivaat angajoqqaat qanimut suleqatigiuaannarnissaat.

Peqqinnarnerusumik ikaarsaariartoqarnissaa anguniarneqartoq

Mælkebøttenip nittartagaani inissiisarfik ima nassuiaavoq:

- Kalaallit Nunaanni sumiginnaanermik ajornartorsiuteqarneq annertusiartorlunilu ersarissiartorpoq, tamannalu pissutigalugu meerarpassuit inuusuttuararpassuillu angerlarsimaffiup avataanut ulloq unnuarlu paaqqinnittarfinnut imaluunniit angajoqqaarsianut inissinneqartarput. Meeqqap inuunerani kingusippallaartukkut angerlarsimaffiup avataanut inissiisarneq pikulasarpoq. Tamatumunnga ilaatigut pissutaapput meeraaqqanut inissiivissanik paaqqinnittarfinnik naammattunik peqannginnera.

Inissiisarfillu naapertorlugu immikkoortortamut tamanna pissutaavoq. Meeqqap Mælkebøttencenterimiinnerani tulliuttumik susoqarnissaa nalilersuiffigineqartassaaq: 

- Meeqqap angajoqqaaminut angerlaqqinnissaa toqqissisimanarnersoq imaluunniit ilaqutarsianut inissinneqassanersut nalilertassavarput, Arnajaraq Hammeken oqarpoq, itisiliillunilu:

- Inissiinerulli sivisuallaannginnissaa pingaaruteqarpoq. Aamma meeqqat naalungiarsuit meeqqallu mikisut qanoq innersut qanorlu innersuussuteqarfigineqarnersugut apeqqutaassaaq.

Innersuussutit najugaqatigiiffimmi suleqatigineqartussanit isumaginninnermik sulisunit katsorsaasuniillu pissarsiarisassavaat.