Maduro qinersivinni inernerit apeqqusernartortaqaraluartut præsidentitut qinigaaqqittoq

Venezuelap præsidentia Nicolas Maduro, præsidentimut qinersinermi amerlanerussuteqaqqarluni 51 procentinit taaguunneqarluni, præsidentitut pingajussaa qinigaavoq.

Qinersinermi taasinerit 80 procentiisa missaat kisinneqareersullu Madurop qinersinermi ajugaanera, Venezuelap qinersinermut ataatsimiititaliaata unnuaq nalunaarutigaa.

Qinersinermili inernerit isornartorsiorneqangaatsialereerput.

Qinersinermi peqquserluttuliortoqarsimanera USA-mit ernummatigineqarpoq.

- Qinersinermi inernerit saqqummiunneqartut Venezuelami innuttaasut piumasaannut naapertuutinnginnerat ernummatigaarput, USA-p nunanut allanut tunngasunut ministeria Antony Blinken oqarpoq.

Illuatungiliuttut qinigassanngortitaata Edmundo Gonzalez Urrutiap qularnaatsumik ajugaasimanera, kisitsisit qinersivinneersut sivisuumik takutikkaluarpaat.

Præsidentimut qinersinermi ajugaasimanera ima qularnanngitsigaaq, taanna inoqatinut attaveqaqatigiittarfikkut X-ikkut ima allammat:

- Qinersinermi inernerit assortugassaanngillat. Innuttaasut allannguiumallutik qinersiartorsimapput, Urrutia sapaatip ataasinngornerullu unnuaani ilaatigut allappoq.

Venezuelami præsidentimut qinersinermi peqquserluttuliortoqartoq, illuatungiliuttut siuttuata Maria Corina Machadop ataasinngornermi ullaakkut oqaatigaa.Edmundo Gonzalez Urrutia 70 procentinit taaguunneqartoq Machadop oqaatigaa.