Maajip aallaqqaataani politikerinut naveersineq: Illoqarfiit minnerusut nunaqarfiillu puiornagit
- Qinikkat ersarissumik apererusuppakka: Nunatta taamatut maannakkut ineriartornera akueriinnarpisiuk, pissusissamisoortutullu isigiinnarlugu, oqaannarlusiluaasit uagummi inuit sumut nuukkusunnersut aqussinnaanngilarput.
Apeqqut kattuffiup SIK-p siulittaasuanit, Jess G. Berthelsenimit pisarneq malillugu maajip ulluisa aallaqqaataanni oqalugiarnermi apeqqutigineqarpoq.
Taannali ukioq manna pisarneq malillugu Nuummi illoqarfiup qeqqani, katersortarfimmi oqalugianngilaq – coronammi ajornartorsiortitsinera pissutigalugu ataatsimoortitsinissaq taamaatiinnarneqarpoq, Jess G. Berthelsenillu oqalugiarnera tassunga taasiullugu Youtubekkut aallaakaatinneqarluni.
AAMMA ATUARUK Maajip aallaqqaataani Nuummi ingerlaaqatigiittoqaranilu katerittoqassanngitsoq
Tamannali nunatsinni politikerinut toqqaannartumik saaffiginninnissaanut tunuarsimaartitsinngilaq. Taassuma nunatsinni illoqarfiit minnerusut nunaqarfiillu ukkatarineqarnissaat kissaatigaa.
SIK-p siulittaasuata oqarnera naapertorlugu suliffissaqannginnerit ineriartortitsinissamullu politikkip ingerlalluannginnera pissutigalugu pingaartumik nunaqarfinnit illoqarfinnut annernut nuuttoqartarpoq. Taamaammat politikerit nunatta ilaanni inuerukkiartortoqannginnissaa pissutigalugu pissutsinik allanngortitsiniarlutik sulissuteqarnerussasorai.
- Sineriassuarput inoqaannartinniarutsigu illoqarfinnik imaluunniit nunaqarfinnik ineriartortitassatsinnik toqqaasariaqalerpugut, Jess G. Berthelsen oqaluummini oqarpoq.
Nunaqavissunut suliffissat
Nunaqavissunut suliffissaqannginnera aamma ajornartorsiutaanera Jess G. Berthelsenip politikerinit aamma qaqinneqartariaqarsoraa.
Nunaqavissut suliffigisinnaasaraluanni nunami allamiut assersuutigalugu Thailandimeersut Filipinerineersullu sulisartut oqalugiaammini oqaatigaa.
- Tassami allaat pølseerniami tikisitanik sulisoqartalersimavugut, tamannalu akuersaarneqarsinnaanngilluinnarpoq, Jess G. Berthelsen oqarpoq.
AAMMA ATUARUK Danmarkimi coronavirusimik toqquteqartut 460-inngortut – napparsimmavimmut unitsinneqartut ikileqqittut
SIK-p siulittaasuata nunaqavissunut nunamilu allamiunut sulinermi atugassarititaasut pitsanngorsarneqartariaqarsorai aamma kommunillu nunanit allanit tikisitsitsinissamut ajornarnerulersitsisariaqarsorai.
Jess G. Berthelsenip oqalugiarnera tamaat uani takuuk:
