Danskit peqqinnissaqarfiisa siniffiit nalinginnaasut 800-it peruluttullu uninngavianni inissat 300-it coronamik tunillatsissimasunut atussagaat piumaffigineqarput.Assi: Henning Bagger/Ritzau Scanpix

Danmarkimi coronavirusimik toqquteqartut 460-inngortut – napparsimmavimmut unitsinneqartut ikileqqittut

Danmarkimi coronamik tunillatsissimasut napparsimmavinnut unitsinneqartut qaammatip ataatsip ingerlanerani ikiliartorput, taakkulu tallimanngornermi 249-pput.

Coronavirusimik tunillatsissimanermi kingorna toqusut suli amerliartorput, napparsimmavimmulli unitsinneqartut amerlassusaat suli ikiliartorlutik, taakku qaammatip ataatsip ingerlanerani ikiliartuinnavipput.

Coronamik tunillatsissimanermi kingorna toqusut amerlassusaat tallimanngornermi 460-inngorput. Statens Serum Institut taama paasissutissiivoq.

Tamatuma saniatigut napparsimmavimmut unitsinneqarsimasut arfinilinnik ikilillutik 249-nngorput. Taakkunannga 61 perulunnertik pissutigalugu peruluttut uninngavianniipput. Taakkulu sisamanngornermit ataatsimik ikinnerullutik.

Peruluttut uninngavianniittunit 44-t anersaartuuteqartinneqartariaqarput. Taakkulu ullup ataatsip ingerlanerani arfinilinnik ikilillutik.

Tamatuma saniatigut napparsimmavimmut unitsinneqartut tuniluuttoqaleqqaaneranut sanilliullugu ikiliartortut kisitsisit takutippaat.

AAMMA ATUARUK Ilisimatusaat nutaaq: Nakorsaat Remdesivir coronaviruseqartut iluaqutigigaat

Unitsinneqartut nutaat amerlassusaat oqartussanit qanimut malinnaavigineqarput, coronavirusimmi inuiaqatigiinni tuniluunnera tassuuna takussutissaqartinneqarmat.

Napparsimmavimmi uninngasut inissaqartitsinermit ikinnerungaatsiarput.

Danskit peqqinnissaqarfiisa siniffiit nalinginnaasut 800-it peruluttullu uninngavianni inissat 300-it coronamik tunillatsissimasunut atussagaat piumaffigineqarput.

Taakku qaammatini arlalinni piareersimasussanngortillugit inissinneqarput. Naatsorsuutigisamit sivisunerusumik tuniluuttoqarnissaa naatsorsuutigineqarpoq.

Coronamik tuniluuttoqarnera danskit naalakkersuisuisa oqartussaasuisalu aallaqqaammut naatsorsuutigisaannit ajunnginnerusumik ingerlavoq.

Statens Serum Institutilli coronavirusimik tunillaasoqartarnerata annertussusaa inuiaqatigiit ilaanni, poorskip kingorna ammaasoqarnerata qaffalaarsimagaa sisamanngornermi paasissutissiissutigaa.

AAMMA ATUARUK Tamaat isigalugu: Coronavirus pillugu killiffik

Tunillaanerup annertussusaa – tunillatsissimasup nammineerluni qassinut tunillaasarneranut takussutissiivoq – taanna 0.6-imiit 0.9-mut qaffappoq.

Tassa imaappoq coronavirusimik tunillatsissimasup allat 0,9-mik amerlassuseqartut tunillattarpai. Kisitsisilli 1,0-ip ataaniitsinnerani tuniluuttoqarnera sakkukilliartortuuvoq.

Piffissap tullissaa pillugu maanna isumaqatigiinniartoqaleruttorpoq. Ilaatigut pisiniarfissuit ammaqqinnissaat aamma neriniartarfiit caféllu eqqaanni nerisoqarsinnaaneranik ammaaqqinnissaq oqallisigineqarput.

/ritzau/

Isummersuutit