Ilisimatusaat nutaaq: Nakorsaat Remdesivir coronaviruseqartut iluaqutigigaat

Nakorsaat Remdesivir coronaviruseqartut nakorsaatigisinnaasaattut sivisuumik eqqartorneqarpoq. Tamannalu ilumoortortaqarunartoq, amerikamiut ilisimatusaataanni erserpoq.

Coronaviruseqartuni Remdesivirimik nakorsaaserneqarsimasut sivikinnerusumik uninngasartut ilisimatusaammi paasineqarpoq. Taakku nakorsaaserneqanngitsunit ulluni 15-ini uninngasimasunit ulluni aqqaniliinnarni uninngasimapput, tassa ullunik sisamanik sivikinnerusumik.

Rigshospitali tusagassiorfinnut taama nalunaarpoq.

Coronaviruseqarlutik uninngasut misissuinermi nakorsaataasuusaamik tuninagit Remdesivirimik nakorsaaserneqartarsimapput, coronavirusimillu toqqutillit 11 procentimiit 8 procentimut ikileriarsimasut tamatuma kingorna erserpoq.

Uumasunut misileraaneq assinganik ersersitsisoq

Nakorsaat Remdesivir sunniuteqartartoq, nappaatinut tunillaattartut pillugit professori Rigshospitalimeersoq Jens Lundgren isumaqarpoq.

- Nakorsaatip coronaviruseqarlutik peruluttunut misilerakkatta siulliup sunniuteqartarunarneranik paasisaqarnerput nuannaarutissaaqaaq, Jens Lundgren oqarpoq.

AAMMA ATUARUK Coronavirusi Europami aningaasarsiornermut sunniuteqaqisoq

- Maanna oqarsinnaanngorpugut, coronaviruseqarlutik uninngasuni Remdesivirimik nakorsaaserneqarsimasut nakorsaaserneqarsimanngitsunit peqqissiaarnerusartut. Tamanna uumasunut misileraanikkut paasereernikuaarput. Taannalu inunnut coronaviruseqartunut aamma sunniuteqartartoq maanna uppernarsivarput, Jens Lundgren tusagassiorfinnut nalunaarpoq.

Amerikami peqqisutsimik ilisimatusarfik National Institutes of Health (NIH) misissuisuuvoq, danskillu ilisimatuut aamma misissueqataapput.

Kinami misissuineq

Jens Lundgren nunani tamalaani ilisimatuut attaveqaqatigiffianni, INSIGHT-imi, aamma siulittaasuuvoq. Rigshopitalilu naapertorlugu INSIGHT misissuinermik aatsaat taama sukkatigisumik paasisaqarfiusumik inaarinneqataavoq.

Amerikap inuussutissanut nakorsaatinullu aqutsisoqarfia coronavirusimut nakorsaatip Remdesivirip nakorsaatitut atorneqarsinnaanngornissaanik akuersilertupallannissaminik pilersaarpoq. USA-mi aviisit ilaat The New York Times pingasunngornermi taama allappoq.

Nakorsaalli Remdesivir coronaviruseqartunut sunniuteqartanngitsoq Kinami paasineqarsimasoq, nutaarsiassaqartitsivik AFP allappoq.

Nakorsaat taanna Kinami illoqarfissuarmi Wuhanimi coronaviuseqartunut 200-nut misileraataavoq. Coronaviruseqartunulli hunnorujualuinnarnut misileraaneq inerniliinissamut naammanngitsoq, Jens Lundgrenip siusinnerusukkut erseqqissarpaa.