Múte: Pissutsinik akuersaarneqarsinnaanngitsunik saqqummerartoqarmat qulaajaassaagut
Kalaallit danskillu naalakkersuisuinut siulittaasut, Múte B. Egede aamma Mette Frederiksen nunatta Danmarkillu akornanni 1945-miit ullumimut pissutsit pillugit qulaajaasoqarnissaanik isumaqatigiissummik ullumi atsioqatigiipput.
- Peqqut annerpaarpaavoq nunasiaataasimanerup nalaaninngaanniit ullumikkumut pissutsit pisarsimasut akuersaarneqarsinnaanngitsut amerlasoorparujussuit saqqummereernikuullutillu saqqummertarnerat massakkumut suli ingerlaavartuarmat. Aammalu qaqilerneqarlutillu toqqortorneqarnatik saqqummertariaqarnerat pisariaqarluinnarmat, Múte B. Egede KNR-mut oqarpoq.
Taassuma ministeriunerullu, Mette Frederiksenip, qanoq ililluni taamani pisimasut paasiniarneqarnissaat pisinnaanersoq januaarimiilli oqaloqatigiissutigisarlugit aamma oqaatigaa.
AAMMA ATUARUK Danmark nunarpullu piareertut: Qulaajaasoqalerpoq
Naalakkersuisut siulittaasuata pissutsit akuersaarneqarsinnaanngitsutut taasai ilatigut tassaapput, arnanut spiralilersuisimaneq, meeqqat misileraataasimasut inatsisitigullu ataataqanngitsut.
Spiralilersuisimanermulli suliaq oqallisaaqisoq qulaajaanissamut isumaqatigiissummi ilaanngilaq. Taanna peqqissutsimut naalakkersuisup, Mimi Karlsenip, danskillu peqqissutsimut minsteriata, Magnus Heunickep, immikkut misissussagaat Múte B. Egede ullumi oqarpoq.
Tupaallannavianngitsoq
Naalakkersuisut siulittaasuannut qulaajaanermi taakkua saniatigut pisimasunik allanik ilungersunartunik paasisaqartoqassagaluarpat tupaallannartuussanngilaq.
- Tupaallannartoqarnavianngissoraara allanik pisoqartarsimaneranik akuersaarneqarsinnaangitsunik saqqummertoqassappat, Múte B. Egede oqarpoq.
AAMMA ATUARUK Nunasiaataajunnaarsitsineq, pinngitsaaliissummik nuutsitsineq atomimillu qaartartut: Tamarmik ataqatigiipput
Ministeriuneq meeqqanut 1951-mi misileraataasunut upernaaq utoqqatserpoq. Taannalu maanna qulaajaasoqarnissaanut ilaatigut tunngaviusoq oqarpoq.
- Tassalu piffissaq sivisunerusoq qulaajagassaasoq oqaloqatigiissutigaarput; Qanoq iliorluta oqaluttuarisaanerput torersumik qiviarsinnaalissavarput? Tassalu sorsunnersuup kingornani susoqarsimaneranik qulaajaanissamik ullumi inerneqarpoq, Mette Frederiksen oqarpoq.
Suliakkiut ukiamut piariissasoq
Sorpiaat qulaajarneqassanersut suli erseqqivissumik paasinarsinngilaq, suliakkiutilli oqaasertalersornera oktobarimi naammassissasoq, Naalakkersuisut allapput. Taannalu pereerpat qulaajaasoqalissaaq.
Múte Borurup Egedep qulaajaaneq saammaateqatigiikkiartuuaalernissamut pisariaqartinneqaqisumut aallarnisaataassasoq kissaatigaa.
