Múte B. Egedep ukiortaamut oqalugiaataa: Peqqinnissaqarfik, nunasiaataasimaneq silallu pissusiata ilungersunarnera

Naalakkersuisut siulittaasuata Múte B. Egedep (IA) ukiortaamut oqalugiaataani assigiinngitsorpassuit sammineqarput. oqalugiaammi 2022 inuulluaqquneqarpoq ukiorlu nutaaq 2023 tikilluaqquneqarluni.

Pingaartumik ataatsimoorneq utoqqaallu inuiaqatigiinni pingaarutaat ukiortaamut oqalugiaammi immikkut sammineqarput.

Múte B. Egedep qaqortumik annoraaqarluni Erfalasorpullu tunuliaqutaralugu ilaqutariit pillugit oqalugiaanni aallartippaa.

- Inuiaqatigiiuvugummi susassareqatigiinnermik ilaqutariinnilu ataatsimoornermik pingaartitsisut. Taamaattumik neriuppunga ukiumi nutaami ilaqutariittut toqqissisimasumik meeqqatta inuuneqarnissaannut aammalu utoqqartatta ilalersornerunissaannik ukioq tamatta atorumaaripput, Múte B. Egede oqarpoq.

Taanna meeqqat inuusuttullu pisariaqarnerani killilerneqartarnissaannik kaammattuilluni nangippoq.

Killiliinerlu ajortuunngitsoq erseqqissaatigaa.

- Kisiannili inersimasunut minnerunngitsumillu utoqqarnut ataqqinninnermik, ukiuni kingullerni annikilliartuinnarsimasup mumiseqqinnissaanut tamatta pitsanngorsaaqataasariaqaratta.

Múte B. Egedelli utoqqartatta uagutsinnik isumassuisuusimasut qujaniarfigisarnissaat pingaaruteqartoq oqalugiaammini kingusinnerusukkut erseqqissaavoq.

- Utoqqartagut pisariaqartippagut – taakkuuppummi ilinniarfigisassagut.

Peqqinnissaqarfimmi sulisut nersualaarneqartut

Peqqinnissaqarfiup folketingimut qinersisoqarnissaanut nunatsinni sammineqangaatsiarpoq, partiillu tamarmik peqqinnissaqarfiup ilungersunartumik inissisimanera isumaqatigiissutigaat – tamanna ukiortaamut oqalugiaammi aamma erseqqissaatigineqarpoq.

Múte B. Egedep peqqinnissaqarfimmi unammillernartoqangaatsiarnera eqqaavaa sulisullu nersualaarlugit.

- Nunatsinni peqqinnissaqarfinni sulisut ulloq unnuarlu suliuarput. Naak suliffimminni atugassarititaasut pitsaanerusinnaagaluartut. Immikkut peqqinnissaqarfimmi sulisut qujaffigerusuppassi.

AAMMA ATUARUK Partiit nassuertut: Peqqinnissaqarfipput ilungersunartorsioqaaq

Tamatuma saniatigut Naalakkersuisut peqqinnissaqarfimmi atugassarititaasut pitsaanerulernissaanik qulakkeerinialeruttortut siulittaasup oqaatigaa.

- Ukiup qaangiuteqqammersup naalernerani nappaassuarmut kræftimut akiuniarnermut katsorsaanermullu utaqqisunut immikkut ittumik iliuuseqarpugut.

Nunasiaataanermit pissutsit akuersaarneqarsinnaanngitsut

Naak ukiumut nutaamut iseraluartugut ukiortaaq kingumut qivialaarnissamut aamma atorneqartarpoq.

Oqaluttuarisaanermillu qulaajaanermi nutaami ukiut 77-it kingumut qiviassaagut, tassami nunatta Danmarkillu akornanni 1945-mit ullumikkumut pissutsit misissorneqassapput.

Qulaajaasoqarnissaa Naalakkersuisut danskillu naalakkersuisuisa aasaq manna isumaqatigiissutigaat – tamannalu Múte B. Egede ukiortaami oqalugiaammini aamma eqqaavaa.

- Nunasiaataasimanerup nalaaniit ullumikkumut pissutsit pisarsimasut akuersaarneqarsinnaanngitsut amerlasuut saqqummernikuupput, siulittaasoq oqarpoq, nangillunilu:

- Arnanut spiralilersuisimaneq. Meeqqat misileraataasimasut. Inatsisitigullu ataataqanngitsut. Taakku akuersaarneqarsinnaanngitsunit assersuutaapput.

Annaasat amerlavallaarujussuartut

Múte B. Egedep tamatuma saniatigut nunatsinni unammillernarnerpaatut taasani, tassa imminut toqunnerpassuit aamma oqaluuserai.

- Ukiut tamaasa innuttaaqatigut arlallit iluatinnangaartut peeruttarput. Tamanna alianarluinnarpoq akuerineqarsinnaananilu, Naalakkersuisut siulittaasuat oqarpoq.

Sulili neriuutissaqartoq erseqqissaatigaa.

Taamaammat Naalakkersuisut inuusuttunik qanimut suleqateqarlutik pissutsinik mumisitsissasut oqaatigaa.

Pissaanilissuit pissaaneqarniunnerat

Ukraine Ruslandimit februaarimi saassunneqarmat pisoq nunarsuarmi oqallisaalerpoq, saassussinerlu nunarsuarmi aningaasat naleerukkiartornerannik ilungersunartorsiornermillu kinguneqarpoq.

Tamanna nunatsinni aamma malugineqarsinnaasoq, Múte B. Egede oqarpoq.

- Issittup annertusiartuinnartumik nunanit pissaanilissuarnit soqutigineqarlunilu sunniuteqarfigiumaneqaraluttuinnarnerani – Inuiattut ataatsimoornitsigut angusaqarsinnaanerput aatsaat iluamik pisinnaavoq.

Silap pissusiata allanngoriartornera malugineqarsinnaasoq

Ukiup ingerlanerani aamma ajunngitsunik pisoqarpoq. Múte B. Egedep nunatsinni inuussutissarsiutini pingaarnerpaasoq aalisarneq unigani eqaatsumik ingerlanera ilaatigut erseqqissaatigaa.

Aalisartullu nersualaarneqarput.

- Nuannaarutigeqaaralu aalisarneq ukiumi qaangiuttumi unigani eqaatsumik ingerlammat, atuisunit malugilluarneqartumik, Naalakkersuisut siulittaasuat oqarpoq, nangillunilu:

- Aalisartut ilaqutariinni pilersuisuupput. Aalisartut nunatsinni aningaasanik kaaviaartitsipput.

Aalisarnermut inatsit isumatusaartumillu aaqqissuusseqqinneq ukiumi nutaami suliaralugit nanginneqassasut, Múte B. Egede oqarpoq.

AAMMA ATUARUK Aqqaluaq: Kommissionens betænkning er ikke nok til at lave ny fiskerilov

Piniarnerli nalinginnaanngitsumit siallingaatsiarneranik silallu unerisimannginneranik kalluarneqarput – naalakkersuisut siulittaasuata tamanna aamma eqqaavaa.

- Silap pissusaata allanngoriartornerata kingunerisa ilaat ukiumi qaangiuttumi maluginngitsoorunanngilarput.

Silap allanngorarnera angallannermut aamma ajornartorsiuteqartitsingaatsiarpoq.

- Taamaattorli nunattali iluani angallannikkut ilaatigut teknikimik peqquteqartut naammagisimaanngilluinnarpagut, Múte B. Egede oqarpoq, taassuma angallannermi ajornartorsiutaasut annikillisarneqarnissaannut 2023-mi arlalinnik piumasaqaateqalernissaa oqaatigaa.

Silap pissusiata allanngoriartornera ukiortaami oqalugiaatip naggataani sammineqarpoq, Múte B. Egedemmi Naalakkersuisut nunarsuarmioqatit suleqatigalugit silap pissusiata allanngoriartornerata sunniutaanik annikillisaaniartut oqaatigaa.