Lynge: Nunatsinnut assartuussineq unammilleqatigiiffiussanngilaq

Danmarkimiit Nunatsinnut umiarsuartigut assartuussineq, Royal Arctic Line-mit kisermaassilluni ingerlanneqartoq allanngortinneqassanngilaq, taama oqarpoq Attaveqarnermut Naalakkersuisoq, Steen Lynge Atassut. Assartuussinermi akit qaffakkaluttuinnartut, Siumup politikkikkut oqaaseqartartuata, Karl Kristian Krusep maluginiarsimallugit, Royal Arctic Line-p kisermaassilluni Danmarkimiit Nunatsinnut assartuussinerata allanngortinneqarsinnaaneranik, paragraf 37 naapertorlugu periarfissaqarnersoq paasiniarpaa.
Allattoq Apollo Jeremiassen
januaarip 22-at 2014 06:32

Kisianni Attaveqarnermut Naalakkersuisoq, Steen Lynge akivoq, assartuussineq RAL-imit kisermaanneqarunnarpat, assartuussinermi akit suli qaffanneqarnerannik kinguneqaannassammat, tamanna innersuussutigisinnaanagu.

Royal Arctic Line-p kisermaassilluni assartuussineq iluanaarutigisartagaa unammillernermik kipitinneqassagaluarpat, taava Royal Arctic Line Oqartussanit tapiissutinik ingerlanneqalissasoq, Steen Lyngep oqaatiga imalu nangilluni.

- Tamassumunnga pissutaaneruvoq, RAL-ip illoqarfiit assartuiffigisartagai immunut akilersinnaanngitsut tikittuartillugit, sinneqartoorutinik taakku matussuserneqartarmata. Taamaattumik takorlooruminnaappoq unammilleqatigiinnerup pilersinnerani tamassuma pitsanngortinneqarnissaa, Attaveqarnermut Naalakkersuisoq, Steen Lynge oqarpoq.

Royal Arctic Line Naalakkersuisunut qanittukkut qinnuteqarpoq, assartuussinermi akit 10 procentit angullugit qaffanneqarsinnaanerinut periarfissaqarnissaminnik. Tamannalu Naalakkersuisunit akuerineqassappat, RAL-ip aningaasanik isaatitsinera kisermaassiunnaarnermi killormut saatinneqarsinnaasoq, Steen Lyngep qularinngilaa.

- Nunatsinni sanaartorneq Nuummi kisimi ingerlanneqanngilaq. Taamaattumik illoqarfinnut allanut assartukkat qaffappata, soorunami sanaartornermi akit aamma qaffasspput. Taamaattumillu RAL-ip isertitarisartagaat appartussaassallutik.

Steen Lynge oqarpoq innersuussutigalugulu Assartuussinermik Ataatsimiititaliarsuup innersuussutai malinneqassasut, tassalu kisermaassilluni Danmarkimiit Nunatsinnut Royal Arctic Linep ingerlatsinera attatiinnarneqassasoq.

- Assartuussinermut ataatsimiititaliap innersuussutaa malissagutsigu, unammilleqatigiinnerup pilersinneqarnissaa sumut iluaqutaassanersoq takussutissaqanngilaq. Unammilleqatigiinnerli aallartippat akit sanaartornermut akigitinneqartut akii qaffassinnaaneri aarleqqutigineqartariaqarpoq. Taamaattumik ataatsimiititaliap innersuussutaa, taamatut isikkoqartillugu malinneqarnissaa uanga innersuussutigiinnassavara. Attaveqarnermut Naalakkersuisoq, Steen Lynge, Atassut taama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq