Qaqortumi mittarfittaassaq Narsarsuartulli silamik ajornartorsiuteqarfiussasoq

Qaqortumi mittarfittaassami timmisartuussinissamik taamaatitsisarnerit Narsarsuarmi sila pissutigalugu ullumikkut taamaatitsisoqartariaqartarneratulli amerlatigingajassapput. Attaveqaqatigiinnermut naalakkersuisoq naapertorlugu, Kalaallit Airports A/S taama naatsorsuuteqarpoq.
Allattoq Anton Gundersen Lihn
septembarip 20-at 2018 07:46
Nutserisoq Simon Uldum

Narsarsuarmut missinnaassutsip akulikissusia nunatsinni ullumikkut appasinnerpaavoq, ima paasillugu timmisartunit silap qanoq innera apeqqutaatillugu miffigineqarsinnaatiginera appasinnerpaalluni.

Ullumikkut ilisimaneqartut naapertorlugit, Qaqortumi mittarfittaassamut missinnaassutsip akulikissusiata taamaannissaa naatsorsuutigineqarpoq.

Sumiiffimmi mittarfittaassap inissisimaffigisassaani anorlertarneranik silaannaallu aalaruluttarneranik misissuinerit amerlanerusut pisariaqartinneqartut Kalaallit Airports A/S-ip siorna decembarip qaammataani nalunaarutigaa.

AAMMA ATUARUK Mittarfinni ukunani sila ajornartorsiutaanerpaasarpoq

Simon Simonsenilu naapertorlugu misiliummik timmisartornerit upernaarli piareersarneqarput, silalli qanoq issusia ima ajorsimatiginngilaq, misiliummik timmisartornerit ingerlanneqarsinnaasimanatik.

Misiliummillu timmisartornerit pereerpata, mittarfimmut missinnaassutsip akulikissusia eqqornerusumik naatsorneqarsinnaanngussaaq. Maannali ilisimaneqartut naapertorlugit, Qaqortumi mittarfittaassaq nunatsinni mittarfiit silarlukkajunnerpaat ilagissavaat, attaveqaqatigiinnermut naalakkersuisoq Simon Simonsen taama ilisimatitsivoq.

AAMMA ATUARUK Qaqortumi mittarfiliortoqarnissaanut misissuinerit nutaat pisariaqartut

Aamma atuaruk