Løkkep partiiata Moderatit attaveqatigiinnermut pisortartaava Aaja Chemnitzip appiukkaa

Lars Løkke Rasmussenip partiiatalu Moderatit Ulla Østergaard attaveqatigiinnermut pisortatut partiiminni atorfinitsippaat. 

Ulla Østergaard Inatsisartunut 2021-mi qinersinngitsiarnitsinni Múte B. Egede (IA) pillugu eqqunngitsumik nutaarsiassereerluni nutaarsiassaqartitsivimmi TV 2-mi 2021-mi aaqqissuisuunerujunnaarpoq.

Taassumalu attaveqatigiinnermut pisortatut Moderatini atorfinitsinneqarnera isorigini, Aaja Chemnitz aviisimut B.T.-mut oqarpoq.

- Politikkikkut sianiilliornerujussuuvoq. Danmarkip nunattalu aallartitaqarnikkut suleqatigiinnerat paasisimasaqarfigisariaqarpoq.

Múte B. Egede aningaasatigut nammineq iluaqutissaminik suliani marlunni attuumassuteqarpallaartoq, TV 2 ilanngutassiamini Inatsisartunut taamani qinersinissamut ullualuinnanngorneranni saqqummiussamini allappoq. Tamanna eqqunngilaq, TV 2-llu ilanngutassiani tamatuma kingorna peerpaa.

Østergaard tamatuma kingorna TV 2-miikkunnaarpoq. Taama ilanngutassioqquneqarlutik Østergaardimit kimigiiserfigineqarsimallutik, TV 2-mi sulisut pingasut taamani oqaatigaat.

Isornartorsiuineq tunngavissaqanngitsoq, Moderatit allattaanerat Kirsten Munch Andersen oqarpoq.

- Ulla Østergaard TV 2-p Kalaallit Nunaanni Inatsisartunut ukiut marluk matuma siorna qinersinissamut atatillugu eqqunngitsumik ilanngutassiornerani aaqqissuisuunertut akisussaavoq. Kukkunermut tassunga imminut akisussaatillunilu utoqqatserpoq, Kirsten Munch Andersen B.T.-mut allappoq.

Løkke nunamut namminermut peqqinnissamullu 2001-imi ministerinngormat, Ulla Østergaard Løkkemut siunnersortaaninngorpoq. Løkke taamanikkut Venstrekkunniippoq.