Tasiilami najukkami ataatsimiititaliap aaqqissugaanik innuttaasunik ataatsimiisitsisoqassaaq
Tasiilami imigassat tuniniarneqartarnerisa matuneqarnissaat pisariaqarsimavoq, najukkamilu ataatsimiititaliami ilaasortat ajornartorsiuterpassuarnut tamanna aaqqiinerugallartuinnaasoq ilisimalluarpaat.
Taamaattumik innuttaasunik oqaloqateqaqqinnissaq pisariaqarpoq, imigassamik atornerluisarnerup tarnikkullu ajortorsiuteqarnerit pitsaaliorneqarnissaanut isummanik nutaanik pissarsiniarluni.
AAMMA ATUARUK Tasiilami inissaaleqineq neriuuteqannginnerlu unammillernartut
- Ataatsimiinerup annertunerusumik imarissavaa, Tasiilaq ullumikkut, kiisalu aamma siunissaq, innuttaasut uagut, qanoq iliorlutaana pitsanngorsaaqataasinnaasugut atornerluinerit assigiisaallu pilugit, Tasiilami Najugakkami ataatsimiititaliap siulittaasua, Ole Jens Lundblad oqarpoq.
- Tasiilami nunaqarfiinilu septembarip 17-iata tungaanut aalakoornartutalinnik imigassaarniarneq matuvoq.
- Tamanna niuertarfinni imerniartarfinnilu atuuppoq.
- Nunaqarfiit tassaapput Kuummiut, Isertoq, Tiilerilaaq, Sermiligaaq Kulusullu.
- Kalaallit Nunaata kangiani kimittuunik imigassaarniartoqanngilaq.
- Tasiilami nunaqarfiinilu Ittoqqortoormiinilu, aalakoornartutalinnik imigassanik 15 procentinit kimittunerusunik sassaalliineq tuniniaanerlu inerteqqutaavoq.
lnnutaasunik ataatsimiisitsisoqarnerani najukkami ataatsimiitityaliameersut, oqartussaasut assersuutigalugu politiineersut peqqinnissaqarfimmeersullu najuutissapput.
Inunnik isumaginninnermik suliaqartut pikkorissartinneqarnissaat kissaatigineqartoq
Ole Jens Lundbladip najukkami ataatsimiititaliami ilaasortaqataata Tobias Baajarip kommunimi isumaginninnermut siunnersortinik ilinniarsimasunik amigaateqarnerarpaa.
- Rejseholdinik taaneqartut, taakkua Tasiilamut tikikkaangamik pikkorissartitsineq annertunerusumik suliarisarpaat, iluarnerussagaluarpoq Rejseholdit ilaqutariinnut meeqqanullu sullissivimmi sulisuni pikkorissartitsisartuuppata, nalunngilarpummi tamakkuninnga ilinniarsimasunik pissarsiniarneq ajornartorujussuusoq, taakkua pimoorullugit ilinniartinneqartuuppata taamaalilluni ajornartorsiutinik kivitsineq ajornannginerussagaluarmat, Tobias Baajari oqarpoq.
AAMMA ATUARUK Naalakkersuisut Tasiilami pissutsinut itinerusumik iliuuseqarnissamut pilersaaruteqanngikkallarput
Najukkami ataatsimiititaliami ilaasortat marluk aamma eqqaavaat, nammineq piumassutsiminik isumaginninnermik suliaqartunik pisariaqartitsisoqartoq assersuutigalugu unnuarissanik.
- Marlunngorpat innutaasunik ataatsimiisitsinermi tamanna aamma qaqilerneqassaaq, taava taakkuninnga sulissuteqarusuttut ikortissarsiussapput, Unnuarissat aallartisarnissaanik, taakkuami aallartinnikuugaluarput kisianni unittooqqittaramik, taamaattumik aamma taanna neriuutigalugu, inunnik katersuisinnaagutta, kikkut soqutiginninnersut, katersoriarlugit taakku aamma immikkkut pilersinneqarnissaat siunertaavoq, Ole Jens Lundblad oqarpoq.
Imigassamik tuniniaanerup matuneqarnissaa pisariaqartoq
Tasiilami najukkami ataatsimiititaliami siulittaasoq isumaqarpoq, imigassamik matusineq ajunngitsuusoq naak tamanna aaqqiinerugallaannaraluartoq, siulittaasoq oqarpoq.
AAMMA ATUARUK Tasiilami atuartut eqqissiviilliorneq malugisinnaagaat: Kammagiinnerpaat allaat imminnut ingalassimanialerput
- Imigassamik matusigallarneq ulluni 14-ini, immaqa kialluunniit taamatut matusigallarnerit iluaqutaavallaarneq ajortut ilisimaneqaraluartoq, kisianniliuni maani pissutsit naapertorlugit soorlu peqqinnissaqarfikkut immaqa aamma politeeqarfikkut annertoorujussuarmik suliassaqaleriataaramik, taavalu peqqinnissaqarfik saaffiginninnikuuvoq, soorlu taakkua suliassatik artupajaalerlugit, taavalu arlaatigut anersaartorfissamik perusulaarlutik, Tasiilami Najukkami Ataatsimiititaliami siulittaasoq Ole Jens Lundblad oqarpoq.
Akileraarutinit utertoortoqarnerani aamma ullut ikittut qaangiunneranni akissarsisoqarnerata kingorna innuttaasut arlaqartut erngupput, persuttaanerit arlaqartut nalunaarutigineqarlutik imigassartorsimanermullu attuumassuteqartunik allanik ajornartorsiutinik pisoqarfiulluni.
