Naalakkersuisut Tasiilami pissutsinut itinerusumik iliuuseqarnissamut pilersaaruteqanngikkallarput
Tasiilami inuttut ajornartorsiutit ilungersunartut annernartullu inuttaasut arlaqaqisut sorsutassaraat. Maannalu kommunemi politikerit naalakkersuisullu Tasiilami imigassamik ulluni 14-ni matusipput.
Naalakkersuisullumi aamma itinerusumik iliuusissamik peqanngillat. Soorlu Peqqissutsimut naalakkersuisoq Kista L. Fencker (N) tamanna pillugu ima politikkeqarpoq:
- Saaffigineqarattaana kommunemiit peqqinnissaqarfimmiillu matoqqusillutik, taamatut kissaateqarnerat ataqqillugu naalakkersuisuni taperserlugu matuarput, Peqqissutsimut naalakkersuisoq Kista L. Fencker tunngavilersuivoq.
Piffissamut ungasinnerusumut isigaluni pilersaaruteqanngillat
Politikerit Tasiilaq pillugu aalajangiissagaangamik pipallattumik ungasissumullu isiginninngitsumik aalajangiivallaartartut, Tasiilami alivarpiup pisortaa Jørn Holbæck uparuaavoq:
- Tasiilami ajornartorsiutit ilorraap tungaanut aallassappata taava politikkikkut ungasissumut isigisumik politikkeqartoqartariaqarpoq, aammalu illoqarfimmi pioreersut atorluarneqartariaqarput, tassa illoqarfimmi Tasiilami pissutsinut ilisimaarinnilluartut atorneqartariaqarput, imatuunngitsoq avataaneersunik tassa Nuummeersunit angalallutik aaqqiigasuariartortut tikisillugit imaluunniit siunnersortinik konsulentinik tikisitsisaqattaarnerit pinagit. Ilaqutariimmi pineqartut ukkataralugit qitiutillugit aaqqiisoqartariaqarpoq, Tasiilami alivarpimmi pisortaasoq Jørn Holbæck siunnersuuteqarpoq.
AAMMA ATUARUK Tasiilami atuartut eqqissiviilliorneq malugisinnaagaat: Kammagiinnerpaat allaat imminnut ingalassimanialerput
Peqqissutsimut naalakkersuisoq Kista L. Fencker aperaarput Tasiilami pissutsit taamaannerat naalakkersuisutut qanoq isumaqarfigineraa:
- Tasiilami taamatut inissisimasoqarnera ilungersunarpoq, ajoraluaqaarlu tassunga killittariaqaratta imigassaq matusariaqarlutigu. Paasisakkali naapertorlugit paasitinneqarpunga innuttaasut pisortaqarfillu imminnut qaninnerulersimasut, neriuppungalu taanna atorluarneqassasoq, tamatumunnga naalakkersuisuni tapersersuiumaarpugut, Kista L. Fencker oqarpoq.
Tasiilami imigassaq aatsaat matulinngilaq
Tasiilamili imigassaq aatsaat matulinngilaq matusigaluartarnerillu iluaqutaanngisaannarput.
- Naalaarpugut peqqinnissaqarfik, politiit kommunelu qanimut suleqatigiillutik innuttaasut peqatigalugit qanoruna ingerlariaqqinnissamut takorluugaqarniartut aammalu uagutsinnut qanoq apuussiniarpat? Taakkulu aallaavigalugit suleqataanissamut piareersimavugut, Kista Fencker oqarpoq.
Peqqissutsimut naalakkersuisoq Kista L. Fencker apereqqipparput, Tasiilami pissutsit ilungersunartut uteqqissanngippata nammineerluni naalakkersuisutut qanoq iliorsinnaanersoq:
- Najugaqarfimmi sulisut innuttaasullu nalunnginnerpaavaat suna pisariaqartinneqarnersoq, taakku kissaataat siunnersuutaallu uagutsinnut apuunnissaat utaqqivarput. Tassanngaanniillu qisuariarnissarput tullinnguutissaaq, Peqqissutsimut naalakkersuisoq Kista L. Fencker oqarpoq.
Ilisimatusarfimmi socialvidenskabimi lektori ilinniartitsisorlu Kevin Perry KNR-imut aamma oqarpoq, naalakkersuisut - naalakkersuisutut atisat sullisitik atisariaqaleraat politikkikkullu sunniuteqarluartariaqalersut, soorlu assersuutigalugu tunumi inissaaleqinermut tunngatillugu.
