Tasiilami atuartut eqqissiviilliorneq malugisinnaagaat: Kammagiinnerpaat allaat imminnut ingalassimanialerput
Tasiilami sapaatip akunnerani kingullerni pisoqangaatsiarpoq.
Akileraarutinit utertoorutissat ataasinngornermi tunniunneqarput, aqaguanilu qaammassusiat ikineqarlutik.
Tamatuma kingorna illoqarfimmi ernguttoqangaatsialerpoq.
- Tasiilami nunaqarfiinilu tallimanngornermiit septembarip 17-iata tungaanut atuutilersumik, aalakoornartutalinnik imigassaarniarneq matuvoq.
- Tamanna niuertarfinni imerniartarfinnilu atuuppoq.
- Nunaqarfiit tassaapput Kuummiut, Isertoq, Tiilerilaaq, Sermiligaaq Kulusullu.
- Kalaallit Nunaata kangiani kimittuunik imigassaarniartoqanngilaq.
- Tasiilami nunaqarfiinilu Ittoqqortoormiinilu, aalakoornartutalinnik imigassanik 15 procentinit kimittunerusunik sassaalliineq tuniniaanerlu inerteqqutaavoq.
Tamatuma kingunerisaanik marluk imminut toqupput, imminut toqunnissamik siorasaarisut marluk, angerlarsimaffimmi eqqissiviilliornerit 15-it pinngitsaaliillunilu atoqateqarneq ataaseq.
Tamannalu meeqqat atuarfianni atuartunut kingunerlutsitsisoq, Tasiilami alivarpimmi pisortaq, Jørn Holbech KNR-imut oqarluttuarpoq:
AAMMA ATUARUK Tage Mikiki frygter, når alkoholsalg åbner i Tasiilaq: Vil vi miste vores kære?
- Imminut toquttoqarsimatillugu, nakuusertoqarsimatillugu eqqissiviilliortoqarsimatilluguluunniit, meeqqat aamma akuusarput meeqqallu soorunami tamanna sunnersimassutigisarpaat, Tasiilami alivarpimmi pisortaq, Jørn Holbech oqarpoq nangipporlu:
- Tamatta eqqugaasarpugut, meeqqat aamma eqqugaasarput, qisuariaateqartarlutillu. Meeqqat ilaat aliasuuteqartut takusarpagut. Assersuutigalugu ilaasa kammalaatiginerpaasatik ingalassimanialertarpaat. Tassa imaappoq inersimasoq ajornartorsiorpat meeraq aamma eqqorneqartarpoq.
Meeqqanik sumiginnaaneq
Tasiilami alivarpiip pisortaa isumaqarpoq, meeqqanik sumiginnaasoqartillugu piffissami sivisoorujussuarmi meeqqap tarninganut sunniuteqartussanngortartoq. Angajoqqaallu meeqqaminnik sumiginnaasartut tassaanerarpai namminneerlutik aamma meeraanerminni sumiginnarneqartarsimasut.
- Sumiginnaaneq piffissarujussuarmik atuiffiusussaq takkuttarpoq, meeqqallu eqqorneqartut tamanna misigisussanngortarpaat, angajoqqaat namminneerlutik aamma meeraanerminni sumiginnarneqartarsimagamik aamma namminneq qitornaminnut sumiginnaasunngortarput, tassa imaappoq ajortut naaffeqanngitsutut illutik kaaviiaartuarneri ajornartorsiutinik pilersitsisarput, taanna oqarpoq.
AAMMA ATUARUK Tasiilarmiut imminnut paarinissaminnik neriorsoqatigiittut
Tasiilami peqqinnissaqarfimmut imigassamut attuumassuteqartumik unitsitsinerit saaffiginninnerillu amerlapput. Amerlangaarmatalu peqqinnissaqarfik malinnaasinnaajunnaarpoq.
Taamaammat peqqinnissaqarfiup kommunalbestyrelsit attaveqarfigalugit imigassamik nioqquteqarnerup unitsinneqarnissaa piumasaraat. Kalaallit Nunaanni politiit piumasaqaat tamanna isumaqatigaat, tamannalu Naalakkersuisunit akuerineqarpoq.
Kommunip angalasartoqatigiit siunnersortillu Nuummiit Tasiilamut ikiuiartortillugit aallartippai.
Ataatsimut akisussaaffimmik tigusinissaq pisariaqartoq
Jørn Holbech erseqqissaavoq ajornartorsiutit aaqqinniarlugit Nuumminngaanneersunik angalasartunik aammalu siunnersortinik konsulentinik tikisitsinerit pilersartut, illoqarfimmiittut ilaqutariit pineqartussat puigorlugit.
- Ilaqutariit ukkatarineqartariaqarput, aammalu illoqarfimmi nukiit atorsinnaasat qulakkeertariaqarput, imatuunngitsoq angalagasuarlutik aaqqiiartortunik tikisitsisaqattaaratik. Naalakkersuisut kommunemilu politikerit aamma paasisariaqarpaat illoqarfimmi nukiit atorneqarsinnaasut salliutittussaagamikkit taamaalillutik piffissaq uungaannaarannguaq isiginagu piffissaq ungasinnerusoq aamma isigalugu pisoqassagaluarmat, tassanngaannarsuaq aaqqiigasuarnerit pinnagit, tassalu taamatut massakkut aaqqeeriaaseqartoqartarpoq, Jørn Holbæck oqarpoq.
Atuarfimmi pisortap aamma ujartorpaa, innuttaasut ataatsimoorlutik akisussaaffimmik tigusisariaqalermata.
- Inuiaqatigiittut nunaqqatigiittullu nukittunerulertoqassappat siunissarlu qaamanerulissappat inuit akisussaaffimmik ilisimaarinnillutik tigusinissaminnut sapiissuseqartariaqarput, akisussaaffillu taanna tassaavoq ataatsimoorussilluni akisussaaffeqaqatigiinneq, taannalu tassa uanga neriuutiga.
