Lidegaardip Pituffimmit uppernarsaatit saqqummiunniarpai
Tusarniaanermut ministeriuneq Helle Thorning-Schmidt qitiusussaagaluarpoq. Neriuutigalugu Pituffimmut tunngasut akissutissarsinissaat tusarniaanermut Venstret qaaqqusisuusimapput.
Helle Thorning-Schmidtimiilli nutaanik akissutissarsinngillat. Taarsiullugu nunanut allanut tunngasunut ministerip Martin Lidegaardip oqaasereriigai uteqqiinnarpai- tassalu Danmarkip suliaq ilungersunartutut isigigaa.
Suliallu Pituffimmi sullissisussarsiornerup suliarineqarnera tamaat Kalaallit Nunaat peqataatinneqarsimasoq.
Tamannattaaq pappilissani uppernarsaatini Martin Lidegaardip saqqummiussassaani takuneqarsinnaassapput.
- Suliamut tunngasuni apeqquterpassuusimapput Danmarkip Kalaalit Nunaatalu akornanni suleqatigiinneq qanoq qanitsigalunilu qanoq issimanersoq. Tamatumunnga akissutiga taannaajuarsimavoq: Tassalu ajunngivissuusimasoq, Kalaallit Nunaallu suliap ingerlanneqarnera tamaat tusarniaavigineqartarsimasoq. Tupinnartumilli tamanna ilaannit apeqquserneqartarpoq. Taamaattumik oqarpunga, soorunami qarasaasiatigut, allakkatigut, ataatsimiinnernillu imaqarniliat saqqummiunnissaannut piareersimasugut - tamakkunanimi erserput kalaallit naalakkersuisuisa uangalu arlaleriarluta oqaatigisisarsimasagut. Tamakkulu maanna katersorpavut, Martin Lidegaard oqarpoq.
Erseqqissarpaalu uppernarsaatissat nunanut allanut tunngasunut ministereqarfimmeersut decembarimi 2013-imi aallartittuni - USA piginnaatinneqarmat suliffeqarfik Exelis Service aamma sullissisussatut qinnuteqarsinnaasoq.
Pappilissat uppernarsaatissat
Suliamut tunngasumik pisortat paasissutissaataannik tamakkiisumik allakkatigut paasissutissinneqarnissamik qinnuteqareernermi siusinnerusukkut KNR Radioaviisimi taanna eqqartoreerparput.
Pappilissalli uppernarsaatissat tamarmik saqqummiunneqarnavianngittut ministeri oqarpoq. Atorfilittat ministerillu akornanni attaveqatigiittarsimanerneersut.
- Una peqqutaavoq, Danmarkip Kalaallit Nunaatalu attaveqatigiittarsimanerannut tunngassuteqanngimmata. Kalaallit Nunaanni misissuisoqannguatsiarpoq Nalaakkersuisut iluanni susoqarsimanersoq. Tamanna akuleruffigissanngilara, misissukkattali aamma ilagaat. Taamaalioraluarutta suliani assingusuni Folketingip naalakkersuisullu akornanni ileqquliuneqarsinnaammat tulluanngitsoq. Tamannami aamma apeqqutigineqanngimmat. Apeqqutigineqartoq tassaavoq suliaq pillugu Danmark Kalaallit Nunaallu qanoq qanitsigisumik suleqatigiissimanersut. Pappialallu uppernarsaatissat tamanna takutikkumaarpaat, Martin Lidegaard oqarpoq.
Nunanut allanut tunngasunut minitserip naatsorsuutigaa pappilissat uppernarsaatissat sapaatit akunnerisa marluk ingerlaneranni saqqummiunneqarnissaat.
