Politikki Avatangiisit

Lidegaard: Naalagaaffeqatigiinneq angineruppat sunniuteqarusinnaavugut

Naak qalasersuup tungaani Danmarkip Nunattalu FN-imi piumasaqaatiginiagaani aatsitassanik nassaarnissaq ilimanarpianngikkaluartoq, naalagaaffeqatigiit killeqarfiisa allinissaat pissutissaqarluartoq, danskit nunanut allanut tunngasunut ministeriat isumaqarpoq.

Allattoq Helle Nørrelund Sørensen

decembarip 15-at 2014 15:24

Nutserisoq Jens Thorin

895.000 kvadratkilometerit - tassa Danmarkip annertuussusiata 20-riaataa.

Nunatta Danmarkillu pigilerumallugu ataatsimoorlutik FN-ip imartanik piginnittussaanermut ataatsimiititaliarsuanut piumasaqaatiginiagaa tassa taama angitigaaq. Ilisimatuussutsikkut misissuereernermi naalagaaffeqatigiit imartaasa allissutigisariaqagaa qalasersuup tungaaniittoq taamaassaaq.

Aamma atuaruk Issittup imartaanik piginnittuulernissamik Danmark piumasaqaateqartoq

Imartarujussuarmullu piginnittuunissamik suaarutiginninnissaq pingaaruteqartoq, danskit nunanut allanut tunngasunut ministeriat Martin Lidegaard isumaqarpoq. Aamma taamaappoq, naak tamaani aatsitassanik ikummatissanillu nassaarnissamut ilimanaatit ilisimatuut mikisunnguatut nalileraluaraat.

- Naalagaaffeqatigiit angineruleriartortillugit, Danmarkip Nunattalu tamaani aqutsinermut sunniuteqarsinnaanermut periarfissai alliartussapput. Tassalu siku aappat tamannalu angallaffiulerpat angallaffiunissaa qanoq aqunneqassava?

- Tamaani pinngortitaq uumasuilu qanoq illersorneqassappat? Aalisarneq qanoq aqunneqassava? Naak qanoq pisuussuteqartiginersoq ilisimanngikkaluarlutigu, tamaani ineriartornerup sapinngisamik annertunerpaamik sunniuteqarfiginissaa soqutigisaraarput, Martin Lidegaard KNR-imut oqarpoq.

Russit kamassaatiginavianngilaat

Imartaq Naalagaaffeqatigiit piginnittuuffigilerumasaat qalasersuup tungaanut imartarujussuup annersaara Ruslandip immami killeqarfianut allaat killilluni. Naallu Nunat killit Ruslandilu Ukrainemi sorsuuneq pillugu allatigullu aaqqiagiinngissuteqaraluartut, Danmarkip Nunattalu piumasaqaataat, russit kamassaatiginavianngikkaat, Martin Lidegaard isumaqarpoq:

- Piumasaqaatigut Ruslandimut, Canadamut Norgemulluunniit qinngasaarutitut isiginngilakka. Ilulissani 2008-mi isumaqatigiissummi malittarisassat maleqqinnaarpagut. Tassanilu isumaqatigiippugut, paasissutissat nunap pissusaanut tunngasut ilisimatuussutikkullu katersat saqqummiuteqqaassallutigit.

- Taakkualu FN-imi ataatsimiititaliarsuarmit arlaannaannulluunniit attuumassuteqanngitsumit akuerineqassapput. Taava killeqarfiit sumiinnissaannit politikikkut isumaqatigiinniarnerit aallartissapput. Kisianni tamakkua ukiut qulit immaqaluunniit allaat ukiut 15-it qaangiuppata aatsaat pissapput Kisianni ilisimalikkavut nunap pissusaanut tunngasut soorunami tunngaviussapput. Saqqummiussavut politikkiunngillat ilisimatuussuseruna, Martin Lidegaard KNR-imut oqarpoq.

Aamma atuaruk Issittup imartaata naqqa siunissaq pillugu ilungersuutigineqartoq

Danmarkip piumasaqaataata nalilersuiffigineqarnera ukiunik 10-15-inik sivisussuseqassasoq naatsorsuutigineqarpoq. Ilisimatuussutsikkut paasissutissat tunniunneqartut eqqortuunersut Naalagaaffiit Peqatigiit ataatsimiititaliarsuaata ilaannit aalajangiiffigineqassaaq, nunallu pineqartut pingasut tamarmik akuerineqarnissaat aamma periarfissaavoq. Taamaattoqassappallu akunnerminni isumaqatigiinniartariaqassapput, ataatsimiititaliarsuaq territoriamik tunniussinissamut pisinnaatinneqanngimmat.