Folketingimut qinersineq 2015 Lidegaard Folketingimut qinigaanngitsooratarsinnaasoq
Taakkulu ilagaat danskit nunanut allanut tunngasunut maanna ministererisaat Martin Lidegaard, De Radikalet sinnerlugit qinigassanngortittoq.
Qinersisoqarnissaanut aqaguttoq isumasiuinerit kingulliit naapertorlugit, De Radikalet maannakkut qulingiluanik ilaasortaatitaqartut aqagu sisamanik kinguariassangatinneqarput tallimanik ilaasortaatitaqalissangatinneqarlutik.
Qinigaanngitsoortunullu ilaaratarsinnaavoq Martin Lidegaard, qinersivimmi Nordsjællands Storkredsimi qinigassanngortittoq. Partii qinersivimmi tassani naammattunik taaguunneqanngippat Folketingimut qinigaanngitsooratarsinnaalluni.
Martin Lidegaardip Villy Søvndal, taqqamik milittoornermi kingorna tunuartoq, nunanut allanut tunngasunut ministeritut 2014-imi kingoraarpaa.
Kalaallit Nunaannut inussiarnersoq
Lidegaard Kalaallit Nunaannut inussiarnertuunini pillugu arlalinnit nersualaarneqartarpoq, ilaatigullu Danmarkip nunat tamalaat akornanni tusaaniarneqarnissaanut Kalaallit Nunaata pingaaruteqarluinnarnera oqaatigisimallugu.
Pituffimmili sakkutooqarfimmi kiffartuussinissamik isumaqatigiissut pillugu suliaq danskit nunanut allanut tunngasunut ministereqarfiata aammalu Lidegaardip isigineqarnerannik innarliisimavoq, suliffeqarfiit amerikamiut suliariumannittussarsiuussinerannut neqerooruteqarniartut Danmarkimit akuerineqaqqaartarnissaasa eqqortuuneranik Lidegaardip illersuisimanera pissutigalugu.
EU-p eqqartuussiviata aaqqiagiinngissuteqarfiginissaa pinngitsoortinniarlugu Danmark taamaaliorpoq.
Martin Lidegaardip ilaqutai Nunatsinni ukiuni arlalinni sulillutik najugaqarsimapput, namminerlu aamma nunarput akuttunngitsumik tikeraartarlugu.
