LGBTQ+ pillugu peqatigiiffik akimasuumik nersornaaserneqarnissamut toqqarneqartoq

Peqatigiiffik Sipineq+ suiaassutsit tamarmik akornanni naligiissitaanerup sammineqarnerunissaa LGBTQ+-imilu kalaallisut oqaasertalersuisoqarnissaanik suliaqarsimanini pillugu Danish Rainbow Awardsimut toqqarneqarpoq.

Allattoq Nicole Sander Bertelsen, Jørgen Semionsen

septembarip 06-at 2023 11:32

Nutserisoq Paornánguak Kleist

Peqatigiiffiup Seqineq+-ip Danmarkimi LGBTQ+-imik suliniaqatigiiffiit nersorsaasiisarnerannut Danish Rainbow Awards 2023-mut toqqarneqarsimaneranik nutaarsiassaq Sipineq+-imi siulittaasumit tupaallaatigineqarluni tusarneqarpoq.

- Toqqarneqarnerput tupaallaatigeqaarput peqatigiiffimmi ukioq manna marsimi aatsaat pilersipparput, KNR-imut oqaluttuarpoq.

Aamma atuarukPeqatigiiffik nutaaq LGBT+-imut tunngasunik kalaallisut oqaasiliorniartoq

Sipineq+ peqatigiiffittut nutaajugaluarluni Queer-imik avatangiisillit iluanni pingaarutilimmik suliniuteqarsimanera pillugu toqqarneqartoq, Danish Rainbow Awardimit oqaluttuarput.

Peqatigiiffiup LGBTQ+-imut tunngasunik kalaallisut oqaasiliortoqarnissaa isumaanillu kalaallisuumut nutserisoqarnissaa sulissutigaat.

Ajugaareerpoq

Sipineq+ peqatigiiffinnut ukiup kingulliup ingerlanerani immikkut ittumik malunnaateqarsimasunut kategoriimi toqqarneqarpoq. Kategorii kategoriinut katillugit 14-iusunut ilaavoq.

Nersornaasiilluni takutitsinissaq ukioq manna 14-issaat ingerlanneqassaaq, atoqatigiinneq suiaassutsillu pillugit ikinnerussuteqartunut LGBTQ+-ini inuit, ingerlataqartut peqatigiiffiillu allannguuteqartut nersorneqarnissaannik siunertaqarluni.

Sipineq+-ip taama nutaajutigaluni toqqarneqarnera taamaammat annertuumik ataqqinaataasoq, Qillaq Olsen oqaluttuarpoq.

- Paasisakka malillugit Danmarkimi LGBTQ+-inut nersornaasinerit annersaraat, taamaammat toqqarneqarnerput uatsinnut naammappoq, oqaluttuarpoq.

Nersornaasiineq Københavnimi Cirkusbygningimi 27. septembari ingerlanneqassaaq.

Nutaarsiassami kukkunermik nassaarsimaguit uunga allaffigineqarsinnaavugut.