Steven Arnfjord Ilisimatusarfimmi sociologiuvoq. Piitsuuneq taassuma oqarnera naapertorlugu qaangeruminaappoq.Assi: Ilisimatusarfik

Lektori Tasiilami ilaqutariit piitsut pillugit: Akuerineqarsinnaanngilaq

Kommuneqarfik Sermersuup Tasiilaq aallunnerusariaqarpaa. Isumaginninnermi ikiorsiissuteqarnerusalertariaqartoq suliffissaqartitsinerusariaqartorlu, Ilisimatusarfimmi sociologi isumaqarpoq.

Tasiilami inuit suliffissarsiortutut nalunaarsukkat septemberimi 227-upput. Taakkua siorna taamaalinerani 128-ummata amerleriarsimapput.

Jeremias Nuko taakkununnga ilaavoq. Taassumalu aningaasaqarnera kipiluttunarpoq. Taanna aappanilu marlunnik qitornaqarput. Nukarleq qulinik qaammateqarpoq angajullerlu tallimanik ukioqarluni. Ilaqutariiullutik nerisassanut akissakilliortarnertik pissutigalugu kaallutik innakkajullutik, Jeremias Nuko oqarpoq.

Ilaqutariit taakku 3.000 koruunit missarluinnaannik kommunimit ullut 14-ikkaarlugit isumaginninnermi ikiorsiissutisisarput. Tamannalu ilaqutariit ilungersunartuunerarpaat. 

Tasiilami inuit aatsaat taama aningaasakilliortigisut

 

Tasiilami inuit 2019-imi ukiumut agguaqatigiissillugu isertitaat 2018-imi isertitaannit procentinik marlunnik ikileriarsimapput.

Nanortalimmi inuit ukiumut agguaqatigiissillugu isertitaat procentinik marlunnik aamma ikileriarsimapput.

Tasiilamiuinnaat Nanortalimmiuinnaallu ukiumut agguaqatigiissillugu isertitaat ikileriarsimapput. Nunatta sinnerani illoqarfinni allani inuit ukiumut agguaqatigiissillugu isertitaat amerleriarsimallutik.

 

Tusarfik: Grønlands Statistik

Jeremias Nuko aappanilu aalajangersimasumik suliffissarsisinnaannginnertik aappaattut ajornartorsiutigaat. 

Tamannalu akuerineqarsinnaanngilluinnartoq, sociologi Ilisimatusarfimmilu immikkoortortaqarfimmi aqutsisoq Steven Arnfjord isumaqarpoq. 

Piitsutut alliartorneq ilikkariartornermik innarliisinnaasoq

- Inunnut sisamanut isumaginninnermi ikiorsiissutigineqartartut ikippallaaqaat. Tamanna meeqqanut ilaqutariinni piitsuni alliartortunut sunniuteqartorujussuusarpoq, sociologi oqarpoq.

Piitsutummi alliartorneq meeqqap atuarneranut meeqqerivimmiinneranullu sunniuteqarsinnaavoq.

- Alliartorneranut, ulluinnarni inuuneranut ilikkariartorneranullumi sunniuteqartorujussuusarpoq, Steven Arnfjord oqarpoq.

Tasiilami inuit Naatsorsueqqissaartarfiup kisitsisaatai naapertorlugit 1.985-iupput. Taakkunannga 11 procentii suliffissaaleqisuupput.

Tasiilamilu inuit 2019-imi ukiumut agguaqatigiissillugu 179.000 koruuninik isertitaqarsimammata, ukiup siulianut sanilliullugu isertitakinnerusimapput.

Nuummi inuit ukiumut agguaqatigiissillugu 332.000 koruuninik isertitaqarsimapput. 

Nuuk Tasiilamut ikiuunnerunissaminut imminut pilliutiginerusariaqartoq

Taamaammat nunatsinni illoqarfiit pingaarnersaat Kommuneqarfik Sermersuup immikkoortuini piitsuunerpaamik siuarsaaqataanerusariaqartoq, Steven Arnfjord isumaqarpoq.

Ukiumut agguaqatigiissillugu isertitaat

Tasiilami inuit 1.985-iupput. 

Taakkunannga 11 procentii suliffissaaleqisuupput.
 

Ukiumut agguaqatigiissillugu 179.000 koruuninik isertitaqarsimapput.
 

Nuummi inuit ukiumut agguaqatgiiissillugu 332.000 koruuninik isertitaqarsimapput. 

- Kommunit nutaamik aningaasanik agguaariaaseqalernissaat isumaginninnermi politikkikkut isumaliutigineqarsinnaavoq. Assersuutigalugu Nuuk isertitaqarluartarpoq, tamannalu Tasiilamiut iluaqutigisinnaasaannik aningaasanik nutaamik agguaariaaseqalernissamut atorluarneqarsinnaavoq, taanna oqarpoq.

- Nuummi najugaqarnermut akigititaq akileraarusiinerluunnit procentialunnik procentilluunniit affaanik qaffanneqarsinnaapput, Tasiilamiluunniit najugaqarneq akikilliallanneqarsinnaalluni. Taamaalilluni isumaginninnermi ikiorsiissutit ilaqutariit meerartallit iluaqutigisassaannik amerliallanneqarsinnaassagaluarput.

Piitsuuneq lektorip oqarnera naapertorlugu qaangeruminaappoq:

- Inuit piitsut aningaasaqarnikkut ikiorneqanngikkaangamik aningaasakilliornertik qaangeruminaatsittaqigaat, nunat piitsut allat ilisimatusarfiginerini paasivarput. Piitsuuneq qaangeruminaatsorujussuuvoq, taanna oqarpoq.

- Kommunini politikerit iliuuseqarsinnaapput. Isumaginninnermi ikiorsiissutit tunngaviatigut amerlisinnaavaat. Najukkani ataasiakkaani suliffeqarneq, ilinniartitaaneq ilinniagaqaqqinneq qanoq siarsaavigineqarsinnaanersut aamma misissorneqarsinnaavoq. Taamaalilluni inuit suliffissaaleqisut suliffissaaleqiunnaarnissamut ilinniagarnissaat qulakkeerneqassammat.

KNR-ip Kommuneqarfik Sermersooq oqaaseqartinniarsimagaluarpaa, iluatsinngitsumilli.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl