Lars Lennert Abelsen Taekwon-domi VM-rtuni bronzennappoq

Ukiorpaalunngortuni siullerpaamik Taekwon-domi nunarsuarmi pissartanngorniunnermi Nunatsinneersumik ujaminnattoqarpoq.

VM-mi ujaminnattoq tassaavoq Lars Lennert Abelsen Nuummeersoq

- Unammeriaatsimi tul-mi qernertumik qiterutillit 4. dan-miittut nammineranni bronzennappunga, Lars Lennert Abelsen maanna VM-rfiusumiit Kazakstanimiit oqaluttuarpoq.

Taekwon-domi VM-rtoqarnerani nunat assigiinngitsut 83-it peqataapput unammeriaatsillu assigiinngitsut atorlugit unammisaqqarluni.

Unammeriaatsimi tul-mi aalariaatsit aalajangersimaqqissaartut unammisut dommerinut takutittussaavaat. Unamminermi marlukkaarlutik sassartarput taakkunani ajugaasoq ingerlaqqittarluni.

- Ujamminnattaara assorujussuaq nuannaarutigivara. Nunanut allanut unammisartuunera tamaat ujaminnannissamut qanittarpunga. Pointitigulli inuuttuulaartarpunga imaluunniit makitsinerliornikkut unammersuarnerni ajugaasuusoq unamminerni siusissukkut unammisussanngortarlugu, 33-nik ukiulik Lars Lennert Abelsen KNR-mut oqaluttuarpoq.

Eqqarsarluarneq

- Taamaattumik angusara nuannaarutigisorujussuuara. Upperiuminaapporluunniit inersimasuni suli unammisartuullunga taamatut angusaqarsinnaanera, Lars Lennert Abelsen oqarpoq.

Unamminernilu ingerlaqqittaqattaarnermi ujaminnassinnaanerlu qanilliartulermat eqqarsarluarnissaq pisariaqarsimavoq.

- Tul-mi unamminermi takutinneqartussat matoqqasutut taaneqarsinnaapput. Taamaattumik suliakkiissummik uanga qanoq naammassinnissinnaanera apeqqutaasorujussuuvoq, Lars Lennert Abelsen oqaluttuarpoq.

- Taamaattumik uanga nammineq iliuutsikka kisiisa eqqarsaatigisarpakka unammisama qanoq iliornera eqqarsaatiginaversaaqqissaarlugu, Lars Lennert Abelsen oqarpoq aammalu angusaminik pitsanngoriartitsiniarluni sungiusarnissamut suli piumassuseqarnerulersimanerarluni.

Inukkuluk Lennert Sisimiuneersoq aamma VM-mi unammeqataavoq. Tul-mi qaffasinnerusumik angusaqarsinnaanissamut pointit ikittuinnaat amigaatigalugit inissippoq.

Taekwon-domi nunarsuarmi aamma Europami pissartanngorniunnerni siornatigut Nunatsinneersut ujaminnattarput.