Qinersineq 2018 Samarbejdsparti suli kinguaqqasoq

HS Analysemmi isumasiunera naapertorlugu ullumikkut qinersisoqartuuppat Partii Samarbejdspartiet qinersisartut 1,8 procentiinnaasa qinissagaluarpaat, asulu qinersisartut 2,7 aamma 2,9 procentiinik qinerneqarunik aatsaat isertitaqarsinnaallutik.

Isumasiuinerli partiiliortup Michael Rosingip uippalliutiginngilaa isumasiuinerlu piffissaq sivisunerusoq isigalugu ataannarsinnaanersoq apeqquserlugu.

 - Uagutsinnut tunngatillugu sammisat ilaat pillugit illersorneqartaqaagut sammisallu ilaannut illersorneqarpallaartarata. Uagutsituulli partiiarannguutilluta misissuinerit taamaattut uppernassuseqarpallaartaratik. Samarbejdspartiimik pilersitseqataasoq Michael Rosing oqarpoq.

AAMMA ATUARUK IA aamma Siumut naligiipajaartut

Qinersisussanngorneq tassanngaannartumik suaarutigineqartoq Michael Rosingip ilanngullugu tikkuartuuppaa, partiillu aatsaat pilersinneqartup innuttaasunut nittarsaannissaa ilungersuuteqqaartariaqarsimanerarlugu.

Partiilli nutaap suliniutai suunersut qinersisartunit paasineqarnerulerpata pissutsit allaanerulissaqisut Michael Rosingip qularinnginnerarpaa:
- Qineqqusaarluta aallartilluarutta sorpiaat suliniutiginiarnerivut innuttaasut ilisimanerulissavaat, taamaammallu pissutsit muminnissaat qularinagu. Michael Rosing oqarpoq.

Qinersisoqarnissaannulli sapaatit akunneri sisamaannanngoriikatapput, siornatigullu Demokraatit sinnerlugit ilaasortaasimasoq ulappusereertariaqarpasilluni.

AAMMA ATUARUK Tillie Martinussen Suleqatigiissitsisunut aallarneeqataalerpoq

Naallu isumasiuineq kingulleq pakatsinalaaraluartoq neriuuteqarnini unitsiinnarusunngilaa:

- Ila ila tunniutiinnatinngilagut. Aatsaammi aallartilaarpugut. Michael Rosing Samarbejdspartiimeersoq taama unnersiorpoq.

AAMMA ATUARUK Partiit angummanniarput