Tillie Martinussen Suleqatigiissitsisunut aallarneeqataalerpoq
Attaviitsup Michael Rosingip nutaamik partiliorniarnini sivittajaamik ulapputigaa.
Taanna Demokraatini siorna septembarimi ilaasortaajunnaarpoq, maannalu partiiliornissaminut pisortatigoortumik Tillie Martinussen suleqatigilerpaa.
AAMMA ATUARUK Tillie Martinussen Demokraatinit tunuarpoq
- Suleqataaffigerusutakka suli amerlapput, taamaattumik politikki qimannissaanut suli piffissaasorinngilara. Partiip pingaartitai, politikkikkut anguniakkat, uangalu suleqataaffigerusutakka eqqartungaatsiareerlugit Michael Rosingip partiianut aallartitseqataassallunga aalajangiuppara. Atissaanillu isumaqatigiilluta, tassaassasoq Suleqatigiissitsisut, Tillie Martinussen tusagassiuutinut nalunaarummi allappoq.
Tillie: Aallartitseqataanissara qilanaaraara
Tillie Martinussen Demokraatini decembarip qaammataani tunuliaqutaminit tusaaneqartannginnini tunngavilersuutigalugu ilaasortaajunnaarpoq,
- Politikkikkut angorusutakka partiini massakkut piusuni sulissutigineqanngitsut isumaqarpunga. Nutaamillu iternganit aallartitseqataanissara qilanaaraara, Tillie Martinussen oqarpoq.
AAMMA ATUARUK Michael Rosing matu matorluutigalugulu Demokraatinit tunuartoq
Meeqqat inuusuttullu ikiortariallit suleqataaffigerusuppai, nunanullu allannut tunngasunut naalagaaffeqatigiinnermullu politikki pitsanngorsaaqataaffigerusullugu.
Tusagassiutitigut nalunaarut malillugu partiissap pilersinniarneqartup tunngavissai suli suliarineqarput, suleqataasullu atsiornernik katersileruttorlutik. Qinersinissamut tullermut qineqqusaarnissamut malittarisassat inaarsarneqaleruttorput.