Partiit angummanniarput

Inatsisartunut qinersinissaq suaarutigineqareersorlu partiini nutaani marluusuni ulapputtunnguaqalerpoq. Taakku atsiornerit naammattut katersortussaavaat.
Assi © : KNR
Allattoq Jonas Fievé, Ane-Marie Petersen
marsip 06-at 2018 12:01

Michael Rosingi allamik pilersaaruteqartoq Vittus Qujaukitsup atsiornerit tamakkernissai qularinngilaa.

- Tassa ippassaq ullup ingerlanerinnaani 50-t katersoreernikuugamik tallimanngornerutinnagu taakku amigaatigisagut tamakkissapput, Vittus Qujaukitsoq Nunatta nipaanut marlunngornerup ullaavani oqarpoq.

Partii nutaaq Vittus Qujaukitsup pilersitaa, tassa Nunatta Qitornai, atsiornernik 200-inik suli katersisariaqartoq oqaluttuareqqammerparput.

AAMMA ATUARUK Underskrifter til opstilling annulleret

Piffissarititaq qaangiutinnginnerani ulappupput

Illoqarfinni nunaqarfinnilu qulini atsiornernik katersileruttorlutik Vittus Qujaukitsup KNR-imut maanna oqaatigaa.

Partii qineqqusaartitaqassappat sapaatip akunneri tallimat sioqqullugit atsiornerit 942-t katersorneqareersimassasut   Qinersinermut Ataatsimiitsitaliap Allattoqarfia paasititsivoq.

AAMMA ATUARUK Qaqugu qinersisoqassanersoq Inatsisartut sapaatip-akunnerata tulliani aalajangissavaat

Tassa apriilip 17-iani qinersisoqassasoq Inatsisartut aalajangissappassuk atsiornernik tunniussivissap ullua kingulleq tassaavoq sapaatip akunnerata tulliani marlunngorpat.

Partiip nutaap aappaani, tassa Suleqatigiissitsisut partiianni, atsiornerit 300-t missaat suli amigaatigigaluarlugit qineqqusaartitsinissartik qularinngilaat.

- Qinersinissap qaninnera uagutsinnut apeqqutaavallaanngilaq. Atsiornernimmi katersileruttorpugut, Michael Rosing oqarpoq.

AAMMA ATUARUK Heilmann, Rosing Qujaukitsorlu siulliuniuuttut

Iluatsissanngippat allamik pilersaaruteqarpoq

Atsiornerilli pisariaqartitatik tamakkinngitsuussagaluarunikkit Michael Rosingip qineqqusaaqatissanilu kattusseqatigiiullutik sassarniarput.

Qineqqusaassallutillu ataasiakkaarlutik sassartut atsiornernik 40-nik katersisimasussaapput. Taamaaliornissarlu apeqqutaavallaanngitsoq Michael Rosing oqarpoq.

- Kattusseqatigiit partiillu assigiiginnangajapput. Qinersisit partiinisulli agguarneqartarput. Kattusseqatigiit partiitulli tapisisarput, assigiinngissutituaraali tulliani qinersinissamut atsiornernik katerseqqittariaqassagatta, Michael Rosing oqarpoq.

Aamma atuaruk