Politikkikkut siulliuniuunneq: Heilmann, Rosing Qujaukitsorlu siulliuniuuttut
Tassami partiit allat marluk, Inatsisartunut sassartitaqarusuttut, atsiornernik aamma pisariaqartitsipput.
Michael Rosingip, Inatsisartuni attaviitsup, Demokraatinilu ilaasortaasimasup Inatsisartunut tulliani qinersisoqarnissaanut partiiliorniarnini KNR-imut uppernarsarpaa.
- Partiimi malittarisassaliuleruttorpugut, Rosing KNR-imut oqarpoq. Taassumali politikerit malunnaatillik partiilioqatiginerlugit partiiluunniit qanoq ateqassanera oqaatigerusunngilaa.
Vittus Qujaukitsoq naluneqanngitsutut siorna septembarimili atsiortitsinernik katersilerpoq. Taava tassa imaappoq partiit minnerpaamik pingasut atsiortitsinernik atorsinnaasunik nunamut namminermut naalakkersuisoqarfimmut uppernarsaasussamut atsiornernik tunniussissapput.
AAMMA ATUARUK Vittus Qujaukitsup partiiliornissaminut atsiornerit 942-t katersussavai
Matumani partiinik pilersitsisut ilaat iluatsitaarisinnaapput. Inatsisartunummi qinersinissamut Inatsisartut inatsisaat naapertorlugu partiit nutaat atsiornernik atorsinnaasunik, Inatsisartunut kingullermik qinersinermi taasinerit atorsinnaasut 1/31-iinik atsiortitsisimassapput, matumanilu atsiornertit 942-ssallutik.
Oqaaseq paasinnissutissat matumani ”atorsinnaasuuvoq”. Atsiorneq marlunnik assigiinngitsunik atorsinnaajunnaarsinneqarsinnaavoq. Siulleq, innuttaasut tamarmik atsiorsimasut taasisinnaasuussapput. Aappaalu, taasisinnaasoq atsiorsimasoq partimut ataasiinnarmut atsiorsinnaatitaavoq.
Tassa innuttaasoq partiinut Inatsisartunut qinigassanngortitsiniartunut marlunnut atsiorsimaguni atsiornerup aappaa atorsinnaanavianngilaq. Partii siulliulluni nunamut namminermut naalakkersuisoqarfimmut tunniussisoq atsiortitsinermik akuersititseqqaartuussaaq partiillu aappaata atsiornerup aappaa atsiornernut 942-nut naatsorsuutigisinnaajunnaassallugu.
Nunamut namminermut naalakkersuisoqarfik atsiornernik suli tunniussisoqanngitsoq naalakkersusisoqarfiup KNR-imut paasissutissiissutigaa.
AAMMA ATUARUK Atsiortitsinerit 1000-it katersoreerpagut
