Atassutip siulittaasua: Atsiortitsinerit 1000-it katersoreerpagut
Nunatsinni partiit pisoqaanersaasa ilaata inatsisartuni ilaasortatuaa Mala Høy Kuko partiini qimallugu Siumut partiianut nuummat, Atassut inatsisartuni ilaasortaatitaqarunnaarpoq. Tamatumalu kinguneranik partii inatsisartunut qinigassanngortitsiniarnissamut atsiortitsinernik katersisariaqalerpoq.
Partiit Inatsisartunut qinersinissamut sassartitsiniartoq atsiornernik atorsinnaasunik 942-nik pissarsisariaqarput. Maanna Atassutip atsiortitsinerit 1000-it sinnillik katersorsimalerai, Atassutip siulittaasuata, Siverth K. Heilmannip KNR-imut ilisimatitsissutigaa.
Atassutip atsiortitsinernik katersinera juullinngitsiartoq aallartippoq, siulittaasoq naapertorlugu atsiortitsinerit pingaarnertut illoqarfinni sisamani tassa Maniitsumi, Sisimiuni, Nuummi Qaqortumilu pisimapput.
AAMMA ATUARUK Atassut atsiornernik katersisariaqartoq
- Piffissami taama sivikitsigisumi taama atsiortoqartiginera nuannaarutigalugulu tulluusimaarutigaara. Inuiaqatigiinnit tapersersorneqaqaagut, Siverth K. Heilmann KNR-imut oqarpoq.
Atassutip atsiornerit Kommuneqarfik Sermersuumi Atassutip immikkoortortaqarfiani ilaasortaamut nassiutinnginneranni atsiortitsinerit kingulliit katersornissaat pilersaarutaavoq.
- Atsiornerit Sermersuumi immikkoortortat ilaanni siulittaasumut sisamanngorpat nassiunneqassasut pilersaarutaavoq, taassumalu kommuninut misissugassanngorlugit tallimanngorpat nassiuteqqissinnaavai, Heilmann oqarpoq.
