Tele-Post: Umiarsuarmik aaqqissuiartortussamik suli nassaanngilavut
Qaqortup Islandillu akornanni immap naqqatigut kabelip ajoquteqarnera internettip kigaanneranut pissutaavoq.
Nunatta kujataani Islandillu akornanni immap naqqatigut kabeli ajoquserpoq, ajoqutaasullu iluarsartuunnissaa sapaatit akunneri pingasut tallimallu akornanni sivisutigisinnaassasoq, Telepost nalunaaruteqarpoq.
Tamatumalu kingunerisaanik kujataani piffissami aggersumi internettimik atuisut eqqorneqassapput,
Oqarasuaatit, TV, radiokkullu attaviit aamma kipisaqattaarsinnaasut nalunaarutigineqarpoq.
Immap naqqatigut kabeli Nuup kujataatungaaniit 625 kilomiiterinik ungasitsigisumiippoq,
kabelilu kilomiiterinik pingasunik ititigisumiittoq sisamanngornermi ullaakkut arfineq marluk qeqqata missaani ajutoorpoq, tamatumunngalu atatillugu teknikerit suliarinnittussat aggersarneqarput.
AAMMA ATUARUK Islandimut imaatigut kabelip attavia ajoquteqartoq
Pissutsit imaaliallaannaq iluarsineqarsinnaanngillat. Tamatumunngami pissutaavoq umiarsuarmik kabelimik usisumik aggersitseqqaartariaqarnissaq tamatumalu kingorna kabeli qaqinneqaqqaartussaavoq isui marluk iluarsaassassat nassaariumallugit.
Amerikami avannarlermi nalunaarasuartaateqarnermut aqqutit atorlugit oqarasuaatikkut allatigullu aqqutit tamarmik ingerlatinneqarput, Islandimulli imaatigut kabelip ajoqusernera pissutaalluni ulluni tullerni Nunatta Kujataani internetti kigaannerussaaq.
AAMMA ATUARUK Nunarput tamakkerlugu 4G-mik maanna attaveqalerpoq
Nanoq Mediap internettimik atuisui eqqorneqarput, taakkumi attaveqanngillat.
Attavik taanna Islandimeerpoq taamaasillunilu imaatigut kabelimut avannaaneersumut attaveqartussanngorlugu allanngortinneqarsinnaanngilaq.
Nanoq Mediami pisisartut internettimut attaveqaqqilernissaat qulakkeerumallugu teknikerit immikkut aaqqiissuteqarniarsarisut, TELE-POST-p aamma nalunaarutigaa.
AAMMA ATUARUK Upernavimmiut internetti sukkanerusoq atorsinnaalissagaat